ছ’নি টিভিৰ ৰিয়েলিটি শ্ব’ ছুপাৰ ড্যান্স ছিজন-৩’ৰ শীৰ্ষ ৫গৰাকীৰ ভিতৰত অসমৰ জয়শ্ৰী

ৰাষ্ট্ৰীয় টিভি চেনেল ছ’নি টিভিৰ ৰিয়েলিটি শ্ব’ জনপ্ৰিয় নৃত্য প্ৰতিযোগিতাৰ অনুষ্ঠান ছুপাৰ ড্যান্স ছিজন-৩’ৰ শীৰ্ষ ৫গৰাকীৰ ভিতৰত স্থান লাভ কৰিছে অসমৰ জয়শ্ৰী গগৈয়ে।

বিশ্বনাথ জিলাৰ চতিয়া আৰক্ষী থানাৰ অন্তৰ্গত নাগশংকৰৰ সাত বছৰীয়া জয়শ্ৰীয়ে ৰাষ্ট্ৰীয় পৰ্যায়ৰ এই নৃত্য প্ৰতিযোগিতাখনৰ শীৰ্ষ ৫গৰাকীৰ মাজত স্থান লাভ কৰি স্বাভাৱিকতে ৰাজ্যখনলৈ গৌৰৱ কঢ়িয়াবলৈ সক্ষম হৈছে।

গুৱাহাটীৰ ছয়মাইলৰ দিলীপ ড্যান্স একাডেমীৰ এগৰাকী ছাত্ৰী জয়শ্ৰী গগৈ বৰ্তমান গুৱাহাটীত বসবাস কৰি থকা মুকুল গগৈ আৰু মন্দিৰা গগৈৰ কন্যা।

নৃত্য প্ৰতিযোগিতাখনত শীৰ্ষ ৫ গৰাকীৰ ভিতৰত ১৬জুনৰ নিশা ৮ বজাৰ পৰা ১৭ জুনৰ নিশা ১০ বজালৈ ‘ছ’নি লাইভ’ এপ্লিকেশ্যনৰ জৰিয়তে যিগৰাকীয়ে অধিক ভোট লাভ কৰে তেওঁকেই বিজয়ী নিৰ্বাচিত কৰা হ’ব।

ইয়াৰ মাজতে, প্ৰতিযোগিতাখনত জয়শ্ৰীৰ প্ৰদৰ্শনে বিশেষ সমাদৰ লাভ কৰিবলৈ সক্ষম হৈছে। সমগ্ৰ দেশৰে দৰ্শকৰ সঁহাৰি লাভ কৰাৰ লগতে প্ৰতিযোগিতাখনৰ বিচাৰকসকলৰ প্ৰশংসাও বুটলিবলৈয়ো সক্ষম হৈছে জয়শ্ৰীয়ে।

আনহাতে, জয়শ্ৰীৰ প্ৰদৰ্শনে চতিয়া, নাগশংকৰ, জামুগুৰি, বিশ্বনাথ চাৰিআলিকে ধৰি বৃহত্তৰ নদুৱাৰ অঞ্চলৰ ৰাইজৰ মাজত ব্যাপক প্ৰভাৱ পেলাইছে। জয়শ্ৰীয়ে প্ৰতিযোগিতাখনৰ চূড়ান্ত বিজয়ী হোৱাৰ কামনা কৰি অঞ্চলটোৰ ৰাইজে বিভিন্ন মঠ-মন্দিৰ, মছজিদ তথা গীৰ্জা আদিত প্ৰাৰ্থনা জনাইছে।