২৮ জানুৱাৰীত ৰ’টেৰী ক্লাবে প্ৰদান কৰিব বৃত্তিমূলক উৎকৰ্ষসাধক বঁটা

১৯০৫ চনৰ ২৩ ফ্ৰেব্ৰুৱাৰিতে প্ৰতিষ্ঠা লাভ কৰা আন্তঃৰাষ্ট্ৰীয় সংস্থা ৰ’টেৰী ক্লাবৰ গুৱাহাটী শাখাই অহা ২৮ জানুৱাৰিত প্ৰদান কৰিব বৃত্তিমূলক উৎকৰ্ষসাধক বঁটা। এই সন্দৰ্ভত ৰ’টেৰী ক্লাবে কালি গুৱাহাটী প্ৰেছ ক্লাবত এখনি সংবাদমেল সম্বোধন কৰে।

এই ক্লাবৰ মহানগৰ শাখাৰ সহকাৰী গভৰ্নৰ ড০ নবীন মজুমদাৰে জানিবলৈ দিয়া মতে তেওঁলোকে এই বঁটা প্ৰদান অনুষ্ঠানটো মহানগৰীৰ বিবেকানন্দ সাংস্কৃতিক কেন্দ্ৰত অনুষ্ঠিত কৰিব।

তদুপৰি উক্ত সংবাদমেলত নবীন মজুমদাৰে জানিবলৈ দিয়া অনুসৰি তেওঁলোকে এই বঁটা ২০০৯ চনৰ পৰাই প্ৰদান কৰি আহিছে। উল্লেখযোগ্য যে সমাজৰ পিছপৰা শ্ৰেণীৰ লোকসকলৰ মাজৰ পৰা বৃত্তিগত দিশত পাৰদৰ্শিতা প্ৰদান কৰা তথা সমাজৰ অন্য লোকসকলক জীৱিকা নিৰ্বাহৰ পথ প্ৰশস্ত কৰি অহা লোকসকলক উৎসাহিত কৰিবৰ বাবে প্ৰত্যেক বছৰে কিছুসংখ্যক লোকক এই বঁটা প্ৰদান কৰি আহিছে।এইবছৰো তেওঁলোকে সৰ্বমুঠ ১৬ গৰাকী লোকক এই বঁটাৰ বাবে নিৰ্বাচন কৰি উলিয়াইছে বুলি সংবাদ মেলত সদৰী কৰে।

তেওঁলোকে জানিবলৈ দিয়া মতে মহানগৰৰ এইবাৰো মুঠ ৮ টা ক্লাবে ৰাজ্যৰ ভিতৰুৱা গাওঁ সমূহত গৈ শিক্ষা, কৃষি, ক্ষুদ্ৰ উদ্যোগ ইত্যাদি বৃত্তিগত দিশসমূহত নিজৰ পাৰদৰ্শিতা প্ৰদৰ্শন কৰা লোকসকলক নিৰ্বাচন কৰি উলিয়াইছে। আনহাতে এই ৮ টা ক্লাবৰ প্ৰত্যেকে ২ গৰাকীকৈ লোকক নিৰ্বাচন কৰি উলিওৱা বুলি জানিব পৰা গৈছে।

সমাজৰ বাবে অৰিহণা যোগাই অহা অথচ আৰ্থিক দীনতাৰ বাবে নিজৰ বৃত্তিটোক আগুৱাই নিব নোৱাৰা সকলক বঁটা আৰু আৰ্থিক সাহায্য প্ৰদান কৰি উৎসাহিত কৰাটোৱেই এই সংস্থাটোৰ উদ্দেশ্য।

ইতিমধ্যে এই আন্তঃৰাষ্ট্ৰীয় পৰ্য্যায়ৰ সংগঠনটোৱে ৰাজ্যৰ বিভিন্ন প্ৰান্তৰ পৰা বাছি উলিওৱা কিছুসংখ্যক বঁটা প্ৰাপকৰ নাম প্ৰাকাশ কৰিছে। তেওঁলোকৰ ভিতৰত তেনজিং বডোচা, মাৰ্টিন ৰাভা, শ্ৰীমতী ৰঞ্জনবেন ব্যাস, মৃদুলা তালুকদাৰ, উশাবী পাঠক, চাইদুল ইছলাম আৰু চক্ৰেশ্বৰ ৰয় বুলি জানিব পৰা গৈছে। এওঁলোকক ২৮ জানুৱাৰিৰ বিয়লি ৪ বজাত বিবেকানন্দ সাংস্কৃতিক কেন্দ্ৰত সম্বৰ্ধনা জ্ঞাপন কৰা হ’ব। সংস্থাই জানিবলৈ দিয়া মতে পুৰুষসকলক প্ৰয়াত দেৱকান্ত কাকতি সোৱৰণী বঁটা আৰু মহিলা সকলক প্ৰয়াত নিৰ্মালী কাকতি সোঁৱৰণী বঁটা প্ৰদান কৰিব।

লক্ষণীয় যে এই সম্বৰ্ধনা অনুষ্ঠানত মুখ্য অতিথি হিচাপে বিশিষ্ট শিক্ষাবিদ, গৱেষক তথা বৰ্তমানৰ ডাউন টাউন ইউনিভাৰ্চিটীৰ অধ্যক্ষ ড০ অমৰ জ্যোতি চৌধুৰী আৰু সন্মানীয় অতিথি হিচাপে মহানগৰৰ ডন বস্ক স্কুলৰ অধ্যক্ষ বি. এম. থমাছ উপস্থিত থাকিব বুলি উদ্যোক্তা কমিটিয়ে জানিবলৈ দিয়ে। ইফালে এই সভাত অধ্যক্ষতা কৰিব ৰ’টেৰী ক্লাবৰ জিলা গভৰ্নৰ সুনীল স্বৰাজে।