পাহাৰ লাইনত ভূমিস্খলন, ৰে’ল চলাচল বাতিল কৰিছে উত্তৰ-পূব সীমান্ত ৰে’ল কৰ্তৃপক্ষই

আজি কেইবাদিনো ধৰি হৈ থকা নেৰানেপেৰা বৰষুণৰ ফলত জাতিংগা লাম্পুৰ আৰু নিউ হাৰাংগাজাও ষ্টেশ্যনৰ মাজৰ ৰে’ল লাইনৰ তলৰ মাটি খহি যোৱাৰ লগতে লামডিং-বদৰপুৰ হিলছ ছেকচনৰ বিভিন্ন ঠাইত ভূমিস্খলন হৈছে।

আজি পুৱাৰ ভাগতো উক্ত ঠাইত ৰেল লাইনৰ তলৰ মাটি খহি যোৱাত পাহাৰ লাইনৰ সকলো ধৰণৰ ৰেল চলাচল বাতিল কৰিছে উত্তৰ-পূব সীমান্ত ৰেল কৰ্তৃপক্ষই।

আজি শিলচৰ অভিমুখে ৰাওনা হোৱা যাত্ৰীবাহী ৰে’লখন নিউ হাফলঙৰ পৰা লামডিঙলৈ উভতাই পথোৱা হয়। বিপৰীতে গুৱাহাটী অভিমুখে ৰাওনা হোৱা যাত্ৰীবাহী ৰে’লখন চন্দ্ৰনাথপুৰ ষ্টেশ্যনৰ পৰা শিলচৰলৈ লৈ যোৱা হয়।

আনহাতে শিয়ালদহ-আগৰতলা কাঞ্চনজংঘা এক্সপ্ৰেছ লামডিঙৰ পৰা উভতি যায়। ইয়াৰ উপৰি গুৱাহাটী-শিলচৰৰ মাজত চলাচল কৰা আটাইবোৰ যাত্ৰীবাহী ৰে’ল আজি বাতিল কৰা হৈছে।

 ইফালে ৰে’লৱে কৰ্তৃপক্ষই পুৱাৰে পৰা জাতিংগা লাম্পুৰ আৰু নিউ হাৰাংগাজাও ষ্টেশ্যনৰ মাজৰ ৰে’ল লাইন সূচল কৰাৰ বাবে যুদ্ধকালীন গতিত কাম আৰম্ভ কৰিছে।  অৱশ্যে বৰষুণৰ বাবে কিছু বাধাৰ সন্মুখীন হ’ব লগীয়া হৈছে।

আকৌ বদৰপুৰ-লামডিঙৰ মাজৰ পাহাৰীয়া ৰে’ল পথটোও মেৰামতিৰ কাম কৰি থকা বুলি জানিব পৰা গৈছে। অৱশ্যে শীৰ্ষ ৰে’লৱে বিষয়াই জনোৱা অনুসৰি এই ৰে’ল লাইন সূচল হোৱাৰ বাবে কিছু সময় লাগিব। যিহেতু বৰষুণৰ বাবে পাহাৰীয়ে এলেকাৰ মাটিয়ে পানী ধৰি ৰখাৰ ক্ষমতা হেৰুৱাই পেলাইছে।