কাছাৰত মধুৰা নৈত সন্ধানহীন দুই বন্ধুৰ এজনৰ মৃতদেহ উদ্ধাৰ

কাছাৰৰ মধুৰা নৈত যোৱা সোমবাৰে সন্ধানহীন হোৱা দুই যুৱকৰ মঙলবাৰে এজনৰ মৃতদেহ উদ্ধাৰ হয়। এন ডি আৰ এফ আৰু এছ ডি আৰ এফ বাহিনীৰ দলে উদ্ধাৰ কৰা নিহত যুৱকজনক সুৰজ মালাকাৰ বুলি চিনাক্ত কৰা হৈছে।

উল্লেখযোগ্য যে যোৱা সোমবাৰ অৰ্থাৎ ২২ জুলাইত উদাৰবন্দৰ পৰা পাঁচ জন বন্ধু কাছাৰৰ মধুৰাত ফুৰিবলৈ গৈছিল। তেওঁলোকৰ মাজৰে সুৰজ মালাকাৰ আৰু ৰাজেশ দাসে নদীৰ মাজৰ এটা শিলত উঠি মোবাইলেৰে ছেলফি লৈ থকা অৱস্থাত হঠাৎ পিচল খাই মধুৰা নৈত পৰি যায়।

ইয়াৰে সুৰজৰ মৃতদেহ কালি উদ্ধাৰ কৰা হয় যদিও ৰাজেশ দাসৰ এই পৰ্যন্ত কোনো সন্ধান ওলোৱা নাই। উদ্ধাৰকাৰী দলে তেওঁক বিচাৰি অভিজান অব্যাহত ৰাখিছে।

আনহাতে নৈ পৰি যোৱা বন্ধু দুজনক উদ্ধাৰ কৰিবলৈ তেওঁলোকৰ সৈতে যোৱা মিথন আচাৰ্যী নামৰ এজন যুৱক নৈত নামি যোৱাত মধুৰা নৈৰ খৰস্ৰোতা পানীয়ে তেওঁক উটুৱাই নিয়ে, অৱশ্যে তেওঁ কোনোমতে সাতুৰি নিজৰ প্ৰাণ ৰক্ষা কৰে।

কালি আবেলি উদ্ধাৰ হোৱা সুৰজ মালাকাৰৰ মৃতদেহটোক উদাৰবন্দলৈ অনাৰ পিছত পৰিয়ালৰ লোকে চিনাক্ত কৰি চমজি লয়।