প্ৰধান শিক্ষক অবিহনেই চলি আছে ৰাজ্যৰ সকলো প্ৰাথমিক বিদ্যালয় : প্ৰাথমিক শিক্ষক সন্থা

“প্ৰধান শিক্ষক অবিহনেই চলি আছে ৰাজ্যৰ সকলো প্ৰাথমিক বিদ্যালয়। যাৰ বাবে ৰাজ্যৰ প্ৰাথমিক বিদ্যালয়ত সৃষ্টি হৈছে চৰম অৰাজকতা। ঠিকাভিত্তিক প্ৰধান শিক্ষক অথবা সৰ্বশিক্ষাৰ অধীনৰ প্ৰধান শিক্ষকেৰে চলিছে ৰাজ্যৰ সকলোবোৰ প্ৰাথমিক বিদ্যালয়”-এই গুৰুত্বৰ অভিযোগ সদৌ অসম প্ৰাথমিক শিক্ষক সন্থাৰ সাধাৰণ সম্পাদক নিৰ্মল কুমাৰ গোৱালাৰ।

গুৱাহাটী প্ৰেছ ক্লাবত দেওবাৰে সন্থাৰ হৈ এক সংবাদমেল সম্বোধন কৰি গোৱালাই কয় যে ৰাজ্যৰ শিক্ষা বিভাগৰ প্ৰাথমিক বিদ্যালয় সমূহৰ প্ৰধান শিক্ষকৰ পদসমূহ অসম শিক্ষা সঞ্চালকালয়ৰ পৰা সৃষ্টি নোহোৱাৰ বাবে আজি সহকাৰী শিক্ষক সকলক প্ৰধান শিক্ষকৰ দায়িত্বত থকা ব্যক্তিজনে নিয়ন্ত্ৰণ কৰিব নোৱাৰে।

ইয়াৰ ফলতেই ৰাজ্যৰ প্ৰাথমিক বিদ্যালয় সমূহ আজি নিয়ন্ত্ৰণৰ বাহিৰলৈ গতি কৰিছে বুলি উল্লেখ কৰি ৰাজ্যৰ শিক্ষা বিভাগে প্ৰাথমিক বিদ্যালয় সমূহত প্ৰধান শিক্ষকৰ পদ সৃষ্টি কৰি আইনগতভাৱে প্ৰধান শিক্ষক নিযুক্তি দিব লাগে বুলি দাবী কৰে।

তদুপৰি, সংবাদ মেলত শিক্ষক সংগঠনটোৱে তাপয্যপূৰ্ণ ভাৱে কয় যে ৰাজ্যত হৈ যোৱা বানপানীত চৰ-চাপৰি অঞ্চলৰ প্ৰায় ১৫হাজাৰৰো অধিক স্কুল বেয়াকৈ ক্ষতিগ্ৰস্ত হৈছে। কোনোখন বিদ্যালয়ত আজি পানী শুকাইছে যদিও কোনোখন স্কুল আজিও পানীৰ তলত আছে। প্ৰতিবছৰে বানপানীৰ পাছত সাহায্যৰ প্ৰদান কৰাৰ বাবে ৰাজ্যৰ শিক্ষা বিভাগে বানত ক্ষতিগ্ৰস্ত হোৱা বিদ্যালয়ৰ তথ্যসমূহ স্কুল কৰ্তৃপক্ষৰ পৰা গ্ৰহণ কৰে। কিন্তু দুৰ্ভাগ্যৰ কথা যে ক্ষতিগ্ৰস্ত হোৱা বিদ্যালয়সমূহে  কোনো বছৰে আৰ্থিক সাহায্য লাভ কৰা নাই।

তেওঁলোকে দাবী কৰে যে বানত ক্ষতিগ্ৰস্ত হোৱা বিদ্যালয়ৰ সমূহৰ এটা জৰীপ শিক্ষা বিভাগৰ ফালৰ পৰা কৰি তেনে বিদ্যালয় সমূহক সাহায্য প্ৰদান কৰিব লাগে।

ইপিনে, সংবাদ মেলতে সংগঠনটোৰ সাধাৰণ সম্পাদক নিৰ্মল কুমাৰ গোৱালাই কয়, ”অহা আগষ্টৰ পৰা যদিও ৰাজ্যৰ বিদ্যালয়সমূহৰ পাঠদান পুনৰ আৰম্ভ হ’ব, কিন্তু বানত ক্ষতিগ্ৰস্ত হোৱা ৰাজ্যৰ ১৫হাজাৰৰো অধিক বিদ্যালয়ত পহিলা আগষ্টৰ পৰা পাঠদান কৰিব পৰা অৱস্থাত নাই। কিয়নো বানৰ ফলত সেই সমূহ বিদ্যালয়ত আজি একাঠু পৰ্যন্ত পলস পৰি আছে। কিন্তু বিদ্যালয় সমূহত সেই পলস সমূহ চাফা কৰাৰ বাবে অৰ্থৰ অভাৱ। সেয়েহে আমি ৰাজ্যৰ শিক্ষা বিভাগক অতি সোনকালে ক্ষতিগ্ৰস্ত বিদ্যালয় সমূহলৈ আৰ্থিক সাহায্য যোগান ধৰাৰ দাবী জনাইছো।”

সংবাদ মেলত সংগঠনটোৱে  গড়াখহনীয়াৰ ফলত নদীৰ কাষৰ প্ৰায় অৰ্ধশতাধিক স্কুল নদীত জাহ যোৱা উপক্ৰম হোৱাৰ কথা উল্লেখ কৰি বানত ধুবুৰী, মানকাছাৰ,বৰপেটা, শোণিতপুৰ, ধেমাজি আৰু লখিমপুৰ জিলাৰ অধিক বিদ্যালয়  ক্ষতিগ্ৰস্ত হোৱা বুলি সদৰী কৰে।

তেওঁলোকে লগতে ১৯৯৯আৰু ২০০০চনত নিযুক্তি প্ৰাপ্ত বৰ্তমান বেতন বঞ্চিত ১৫হাজাৰ প্ৰাথমিক শিক্ষকৰ সমস্যাসমূহ সমাধান কৰাৰ বাবেও দাবী জনায়। সংগঠনটোৱে প্ৰকাশ কৰা অনুসৰি ২০১২চনৰ পৰা এইসকল শিক্ষকে বিনা বেতনে চাকৰি কৰি আছে।

সেইদৰে অসম চৰকাৰৰ নতুন পেঞ্চন আঁচনি বাতিল কৰি চৰকাৰে পুৰণি পেঞ্চন আঁচনি পুনৰ কাৰ্যকৰী কৰিব লাগে বুলিও সংবাদ মেলৰ জৰিয়তে দাবী জনায়।

সংবাদ মেলত সদৌ অসম প্ৰাথমিক শিক্ষক সন্থাৰ সভাপতি আয়ুব আলি আহমেদো উপস্থিত আছিল।