আগষ্ট মাহত ১০ দিনতকৈও অধিক বন্ধ থাকিব বেংক : চাওক সৱিশেষ

আগষ্ট মাহ আৰম্ভ হৈ গৈছে। এই মাহটোত ৰাখীবন্ধন আৰু জন্মাষ্টমীকে ধৰি কেইবাটাও উৎসৱৰ দিন আছে যাৰ বাবে বেংক বন্ধ থাকিব।

আপোনাৰ বেংকৰ সৈতে থকা জৰুৰী কামখিনি কৰিবলৈ যোৱাৰ আগেয়ে প্ৰথমতে ৰিজাৰ্ভ বেংক অফ ইণ্ডিয়াৰ বন্ধৰ তালিকাখন জানি লওক।

ইয়াৰ পৰা আপুনি কোন ৰাজ্যত কিমান দিন আৰু কেতিয়া বন্ধ থাকিব সেয়া জানিব পাৰিব।

সাধাৰণতে প্ৰতিখন ৰাজ্যতে বেংকসমূহৰ নিৰ্দিষ্ট বন্ধ থাকে। কিন্তু এইবাৰ আগষ্ট মাহত এনেকুৱা ৮ টা দিন আছে যেতিয়া দেশৰ প্ৰায়ভাগ বেংকেই বন্ধ থাকিব।

উদাহৰণস্বৰূপে, ১৫ আগষ্ট, বৃহস্পতিবাৰে স্বাধীনতা দিৱসৰ বাবে দেশৰ বেছিভাগ বেংকেই বন্ধ থাকিব।

সেইদৰে, ১২ আগষ্ট, সোমবাৰে ঈদ-উল-জোহাৰ বন্ধ থাকিব।

এইখিনিতে কৈ থোৱা যাওক যে মাহটোৰ ৪, ১১,১৮ আৰু ২৫ আগষ্ট দেওবাৰ হোৱাৰ বাবে স্বাভাৱিকতে বেংক বন্ধ থাকিব।

তদুপৰি, ১০ আৰু ২৪ আগষ্ট মাহটোৰ দ্বিতীয় আৰু চতুৰ্থ শনিবাৰ হোৱা বাবে বেংকসমূহ বন্ধ থাকিব।

আনহাতে, ৰাজ্য অনুসৰি উক্ত ৮ দিনৰ উপৰি বন্ধৰ কথা আহিলে মুম্বাইত ১৭ আগষ্টত বেংকৰ কাম বন্ধ থাকিব।

সেইদিনা পাৰ্চি নতুন বছৰ হোৱা বাবে বেংকত আপোনাৰ কামকাজ নহ’ব।

ইপিনে, ২০ আগষ্ট, মঙলবাৰে শ্রী শ্রী মাধৱদেবৰ তিথি উপলক্ষে অসমত বেংকসমূহ বন্ধ থাকিব।

আনহাতে, ৩ আগষ্ট শনিবাৰে কৃষিভিত্তিক তীজ উৎসৱ পালন কৰা হ’ব। প্ৰধানকৈ  পঞ্জাৱ, হাৰিয়ানা আৰু চণ্ডীগড়ত এই উৎসৱ পালন কৰা হয়। সেইদিনা ইয়াত বেংক বন্ধ থাকিব।

ইয়াৰোপৰি, ২৩ আগষ্ট, শুকুৰবাৰে জন্মাষ্টমীৰ বাবে বেছিভাগ ৰাজ্যতে বেংকসমূহ বন্ধ থাকিব।

সেইদৰে, ৩১ আগষ্ট, শনিবাৰে গুৰু গ্ৰন্থ সাহিবৰ আৱিৰ্ভাৱ উৎসৱ। সেইদিনা পঞ্জাৱ আৰু হাৰিয়ানাত বেংকৰ কামকাজ বন্ধ থাকিব।

দেশৰ মুখ্য চহৰসমূহত বেংকৰ বন্ধৰ বিষয়ে জানিবলৈ  https://rbi.org.in/Scripts/HolidayMatrixDisplay.aspx এই লিংকটোত ক্লিক কৰি চাব পাৰে।