আৰক্ষীৰ জিম্মাত নিৰ্মম অত্যাচাৰ; ভুক্তভোগীৰ পিতৃয়ে বিচাৰিলে ডি জি পিৰ হস্তক্ষেপ

ওদালগুৰি জিলাৰ টংলা আৰক্ষী থানাত এজন ২৬ বছৰীয়া যুৱকক নিৰ্মমভাৱে অত্যাচাৰ চলোৱা বুলি যুৱকজনৰ পিতৃয়ে অভিযোগ উত্থাপন কৰি সমগ্ৰ বিষয়টোত আৰক্ষী সঞ্চালক প্ৰধানৰ হস্তক্ষেপ বিচাৰে।

উল্লেখ্য যে জিত মালাকৰ নামৰ এজন যুৱকৰ গোচৰৰ ভিত্তিত ছাব ইন্সপেক্টৰ জন খাংকিঅ’ৰ নেতৃত্বৰ এটা দলে হেলেন ৰাভা নামৰ যুৱকজনক আটক কৰিছিল।

জানিব পৰা মতে যোৱা শনিবাৰে টংলা চহৰৰ কোনোবা মদৰ দোকানত দুই বন্ধু মালাকৰ আৰু ৰাভাৰ মাজত কাজিয়াৰ সূত্ৰপাত হৈ মাৰপিট লাগিছিল। আৰু তাৰ পাছতেই মালাকৰে ৰাভাৰ বিৰুদ্ধে আৰক্ষীক গোচৰ দিয়ে।

‘আৰক্ষীয়ে নিশা তিনি বজাত তাক উঠাই লৈ গৈছে যদিও সোমবাৰ নিশা পৰ্যন্ত তাৰ গ্ৰেপ্তাৰৰ নামত কোনো জাননী জাৰি কৰা হোৱা নাই’। এই কথা জানিবলৈ দিয়ে যুৱকজনৰ মাতৃয়ে।

ইফালে চহৰখনৰ এজন প্ৰতিষ্ঠিত ব্যৱসায়ী হিচাপে পৰিচিত যুৱকজনৰ পিতৃ ভৱানি ৰাভাই সোমবাৰে থানাত উপস্থিত হোৱাত আৰক্ষীয়ে পুত্ৰক নিৰ্মম অত্যাচাৰ চলোৱাৰ লগতে মুকলিৰ বাবদ টকা বিচাৰে বুলিও গুৰুতৰ অভিযোগ উত্থাপন কৰে।

তেওঁ কয়, ‘পুত্ৰৰ মুকলিৰ বাবদ মোৰ পৰা টকা বিচাৰিছে। আৰক্ষী বিষয়াই মোৰ পুত্ৰক কোনো ধৰণৰ অত্যাচাৰ চলোৱা নাই বুলি কৈছে কিন্তু ল’ৰাটোৱে নিজৰ ভৰিৰ ওপৰতে থিয় হ’ব পৰা নাছিল। তদুপৰি দুদিন ধৰি খাব নিদিয়াকৈ তাৰ ওপৰত অত্যাচাৰ চলাইছিল’।

যুৱকজনৰ পিতৃগৰাকীয়ে লগতে কয় যে খাংকিঅ আৰু দুৰ্গা কিংকৰ শৰ্মা নামৰ আৰক্ষী বিষয়া দুজনে মোৰ ল’ৰাটোক লাঠিৰে কোবোৱাৰ লগতে প্লাচেৰেও হাত-ভৰিৰ নখ সমূহ চেপিছে।

উল্লেখ্য যে টংলা আৰক্ষীৰ এনে কু-কাৰ্যৰ বিষয়ে যুৱকজনৰ পিতৃয়ে শীৰ্ষ কৰ্তৃপক্ষৰ ওচৰত অভিযোগ দিয়াত যুৱকজনৰ বিৰুদ্ধে বিভিন্ন জামিন বিহীন গোচৰ জাপি দিছে।

ইয়াৰ উপৰি মঙলবাৰে যুৱকজনক অতিৰিক্ত মুখ্য ন্যায়িক দণ্ডাধীশৰ আদালতত হাজিৰ কৰোৱা হয় আৰু আদালতে তেওঁক ১৪ দিনৰ ন্যায়িক জিম্মালৈ প্ৰেৰণ কৰে।