মানুহৰ অন্ধ বিশ্বাসৰ পৰা কেতিয়া মুক্ত হ’ব মেকুৰী?

আজি আন্তঃৰাষ্ট্ৰীয় মেকুৰী দিৱস।

প্ৰত্যেক বছৰে ৮ আগষ্টৰ দিনটো সমগ্ৰ বিশ্বতে আন্তঃৰাষ্ট্ৰীয় মেকুৰী দিৱস হিচাপে পালন কৰা হয়।

২০০২ চনত বন্যপ্ৰাণী কল্যাণ আন্তঃৰাষ্ট্ৰীয় পুঁজিয়ে ৮ আগষ্টৰ দিনটো মেকুৰী দিৱস হিচাপে পালন কৰাৰ সিদ্ধান্ত লয়।

কিছু কিছু দেশত আৰম্ভণিৰ পৰা আন্তঃৰাষ্ট্ৰীয় মেকুৰী দিৱসক বিশ্ব মেকুৰী দিৱস হিচাপেও পালন কৰি আহিছে। বৰ্তমান গোটেই বিশ্বতে এই দিৱস উদযাপন কৰা হয়।

উল্লেখ্য যে কেইবাখনো দেশে ৮ আগষ্টৰ দিনটো বেচৰকাৰী বন্ধ হিচাপেও পালন কৰে।

ইফালে আন্তঃৰাষ্ট্ৰীয় মেকুৰী দিৱসৰ লগতে বহু কেইখন দেশে নিজাববীয়াকৈও এই দিৱস পালন কৰে। ৰাছিয়াই ৰাষ্ট্ৰীয় মেকুৰী দিৱস পালন কৰে ১ মাৰ্চত।

ইফালে আমেৰিকা যুক্তৰাষ্ট্ৰই আন্তঃৰাষ্ট্ৰীয় মেকুৰী দিৱসৰ লগতে বছৰে ২৯ অক্টোবৰৰ দিনটো ৰাষ্ট্ৰীয় মেকুৰী দিৱস হিচাপে পালন কৰে।

আনহাতে জাপানবাসীয়ে ২২ ফেব্ৰুৱাৰিৰ দিনটো পালন কৰে মেকুৰী দিৱস হিচাপে আৰু সেই দিনটো তেওঁলোকৰ বাবে বেচৰকাৰী বন্ধ সদৃশ হৈ পৰে।

এই বিৰল প্ৰজাতিটোক কেনেকৈ সহায় তথা সুৰক্ষা প্ৰদান কৰিব পাৰি সেইবোৰৰ বিষয়ে সজাগ কৰাটোৱেই হ’ল আন্তঃৰাষ্ট্ৰীয় মেকুৰী দিৱস পালনৰ উদ্দেশ্যে।

উল্লেখ্য যে চ’চিয়েল মিডিয়াই আন্তঃৰাষ্ট্ৰীয় মেকুৰী দিৱসক এতিয়া অন্য এক মাত্ৰা প্ৰদান কৰিছে। বিশ্বৰ বিভিন্ন প্ৰান্তৰ লোকে ছ’চিয়েল মিডিয়াত মেকুৰীৰ ফ’টো আৰু ভিডিঅ’ চেয়াৰ কৰি জন্তু বিধৰ প্ৰতি থকা অপাৰ আনুগত্য প্ৰকাশ কৰে।

কিন্তু এইখিনিতে এটা প্ৰশ্ন হয়, মেকুৰী ঘৰচীয়া জন্তু হয়নে?

আশ্বৰ্য্যকৰ বিষয় এই যে মেকুৰী সম্পূৰ্ণৰূপে ঘৰচীয়া জন্তু নহয়।

বিভিন্ন সময়ত এই জন্তুবিধ মানুহৰ সম্পৰ্কত আহি পিছত পৰিয়ালৰ সৈতে সহৱস্থান কৰিবলৈ লয়। মন কৰিব লগীয়া কথাটো হ’ল বিভিন্ন লোকে মেকুৰী পুহিলেও এই জন্তুবিধ কুকৰৰ দৰে মালিকৰ প্ৰতি দায়বদ্ধ নহয়।

আনহাতে ভাৰতৰ বিভিন্ন প্ৰান্তত মেকুৰীক লৈ এতিয়াও মানুহৰ মাজত আছে কেতবোৰ অন্ধবিশ্বাস। যাত্ৰাপথত মেকুৰীয়ে বাট কাটিলে অমংগল বুলি ধাৰণা কৰে বহু লোকে।

এতিয়া কথা হ’ল মানুহৰ অন্ধ বিশ্বাসৰ পৰা কেতিয়া মুক্ত হ’ব মেকুৰী?

যদি আপুনিও মেকুৰী প্ৰিয় বা আপুনি মেকুৰী পুহিছে তেন্তে মৰম কৰক, সমাদৰ কৰক তথা যেতিয়ালৈকে মেকুৰীটো আপোনাৰ সৈতে আছে তেতিয়ালৈকে ভালদৰে যতন লওক।