বিশ্বকাপত পৰাজয়ৰ পাছতো তৃতীয় বাৰৰ বাবে ভাৰতীয় ক্ৰিকেট দলৰ মুখ্য প্ৰশিক্ষক হিচাপে নিৰ্বাচিত ৰবি শাস্ত্ৰী

অষ্ট্রেলিয়াত ২০২০ চনত অনুষ্ঠিত হ’বলগীয়া টি-২০ বিশ্বকাপলৈ ভাৰতীয় দলৰ মুখ্য প্ৰশিক্ষক হিচাপে ৰবি শাস্ত্ৰীকে পুনৰবাৰ দায়িত্বভাৰ অৰ্পন কৰা হৈছে।

মুম্বাইত থকা ভাৰতীয় ক্ৰিকেট নিয়ন্ত্ৰণ ব’ৰ্ডৰ মুখ্য কাৰ্য্যালয়ত আজি  কপিল দেৱ নেতৃত্বাধীন ক্ৰিকেট পৰামৰ্শদাতা সমিতিয়ে প্ৰশিক্ষক পদৰ বাবে বাচনি কৰি উলিওৱা ছয়গৰাকী প্ৰাৰ্থীৰ সাক্ষাৎকাৰ গ্ৰহণ কৰে।

সাক্ষাৎকাৰৰ অন্তত হোৱা প্ৰায় তিনি ঘণ্টাযোৰা বৈঠকত কপিল দেৱ, অংশুমান গাইকোৱাড় আৰু শান্তা ৰংগস্বামীয়ে ৰবি শাস্ত্ৰীকে ভাৰতীয় দলৰ প্ৰশিক্ষক হিচাপে যোগ্য বিবেচনা কৰে।

ভাৰতীয় দলৰ নৱ নিৰ্বাচিত প্ৰশিক্ষকৰ নাম ঘোষণাৰ বাবে অনুষ্ঠিত কৰা সংবাদমেলত কপিল দেৱে অভিজ্ঞতা, ক্ৰিকেটৰ জ্ঞান, জনসংযোগ আদি বিষয়বস্তৰ আধাৰত ৰবি শাস্ত্ৰীক আন প্ৰাৰ্থীকেইগৰাকীৰ তুলনাত আগস্থান দিয়ে বুলি গুৰুত্বপূৰ্ণ মন্তব্য কৰে।

আনহাতে, প্ৰশিক্ষকৰ দৌৰত ৰবি শাস্ত্ৰীয়ে নিউজিলেণ্ডৰ মাইক হেছেন আৰু অষ্ট্ৰেলিয়াৰ টম মুদীৰ পৰা তীব্ৰ প্ৰত্যাহবান লাভ কৰে বুলিও কপিল দেৱে কয়।

উল্লেখযোগ্য যে, ৰবি শাস্ত্ৰীৰ দৰমহা কিমান হ’ব আৰু তেওঁৰ সন্মুখত কি কি প্ৰত্যাহবান থাকিব আদি বিষয় সম্পৰ্কত ক্ৰিকেট পৰামৰ্শদাতা সমিতি জ্ঞাত নহয় বুলি মন্তব্য কৰি কপিল দেৱে সেয়া বি চি চি আইৰ বিষয় বুলি কয়।

২০১৭ চনৰ জুলাই মাহত দ্বিতীয়বাৰৰ বাবে ভাৰতীয় ক্ৰিকেট দলৰ প্ৰশিক্ষক হোৱা ৰবি শাস্ত্ৰীয়ে আজি তৃতীয় বাৰৰ বাবে ভাৰতীয় দলৰ মুখ্য প্ৰশিক্ষক হিচাপে দায়িত্ব লাভ কৰে।

শাস্ত্ৰীৰ প্ৰশিক্ষণত ভাৰতীয় ক্ৰিকেট দলে ইংলেণ্ড আৰু ৱেলছত অনুষ্ঠিত হোৱা ২০১৯ বিশ্বকাপত ছেমিফাইনেলত পৰাজিত হয়। এতিয়া একেগৰাকী প্ৰশিক্ষক আৰু অধিনায়কৰ নেতৃত্বত অষ্ট্ৰেলিয়াত অনুষ্ঠিত হ’বলগীয়া ২০২০ চনৰ টি-২০ বিশ্বকাপত ভাৰতীয় দলে কেনে প্ৰদৰ্শন কৰে সেয়া লক্ষ্যণীয় হ’ব।