৩১ জানুৱাৰিত অনুষ্ঠিত হ’ব ইউপিপিএল যুৱ গোটৰ কেন্দ্ৰীয় সন্মিলন

ইউনাইটেড পিপল’ছ পাৰ্টী লিবাৰেল(ইউপিপিএল)ৰ যুৱ গোটৰ কেন্দ্ৰীয় সমিতিয়ে ৩১ জানুৱাৰি তাৰিখে দ্বিতীয় সংখ্যক বাৰ্ষিক সন্মিলনখনী অনুষ্ঠিত কৰিব। চিৰাং জিলাৰ থাইকাঝোৰাস্থিত ৰাইনো স্প’ৰ্টিং ক্লাৱৰ খেলপথাৰত অনুষ্ঠিত হ’ব সন্মিলনখনৰ।

ইউপিপিএল যুৱ গোটৰ কেন্দ্ৰীয় সভাপতি সোমনাথ নাৰ্জাৰীয়ে সংবাদ মাধ্যমৰ আগত সন্মিলন সম্পৰ্কে মন্তব্য কৰি কয় যে জাক জমকতাৰে পৰিপূৰ্ণ এদিনীয়া সন্মিলনখনৰ শুভাৰম্ভ হ’ব পাৰ্টীৰ পতাকা উত্তোলনৰে। ইয়াৰ পিছতে চহিদ সকলক শ্ৰদ্ধাঞ্জলী জ্ঞাপন কৰিব ১৩ নং বিটিচি পৰিষদৰ সদস্য মাওতি ব্ৰহ্ম হাজোৱাৰিয়ে।

উক্ত কাৰ্যসূচী সম্পন্ন হোৱাৰ পিছতে ৪ নং বিটিচি পৰিষদৰ সদস্য জিৰন বসুমতাৰীয়ে চিৰাং প্ৰতিনিধি অধিৱেশন উদ্বোধন কৰিব।

এই সকলোবোৰ কাৰ্যসূচী সমাপন হোৱাৰ পিছতে অনুষ্ঠিত হ’ব সন্মিলনখনৰ মুকলি অধিৱেশন। অধিৱেশনখনত মুখ্য অতিথি হিচাপে উপস্থিত থাকিব ইউপিপিএলৰ সভাপতি উৰখাও গৌৰা ব্ৰহ্ম। এই অধিৱেশনতে ইউপিপিএলৰ নেতা তথা বিটিচি পৰিষদৰ সাতগৰাকী সদস্যও সন্মানীয় অতিথি হিচাপে উপস্থিত থাকিব।

বিটিচি অধ্যুষিত জিলা কোকৰাঝাৰ, পৰ্বতঝোৰা, গোসাঁইগাঁও, মুছলপুৰ, তামুলপুৰ, ভেৰগাঁও, ওদালগুৰি আৰু অন্যান্য অঞ্চলৰ পৰা ১০ হেজাৰ লোক সমাবেত হ’ব বুলি আশা প্ৰকাশ কৰিছে আয়োজক মণ্ডলীয়ে।

আনহাতে বিৰ্দয় মুছাহাৰী আৰু নিকেল বৰ্গ’য়াৰীৰ নেতৃত্বত সন্মিলনখনৰ প্ৰস্তুতিৰ কাম পূৰ্ণ গতিত চলি থকা বুলি জনায়।

তেওঁ লগতে কয় যে ইউপিপিএল যুৱ গোটৰ সন্মিলনতে বিভিন্ন বিষয়ত গভীৰ আলোচনা কৰিব আৰু যুৱ সমাজ তথা জনসাধাৰণক আকৰ্ষিত কৰাৰ বাবেও ব্যৱস্থা গ্ৰহণৰ সিদ্ধান্ত ল’ব।