অসমৰ ভিতৰত কাৰ্বি আংলং স্বায়ত্ত শাসিত ৰাজ্য গঠন কৰক; গৃহমন্ত্ৰী অমিত শ্বাহক স্মাৰকপত্ৰ তুলিৰাম ৰংহাঙৰ

কাৰ্বি আংলং স্বায়ত্তশাসিত পৰিষদৰ মুখ্য কাৰ্য্যবাহী সদস্য তুলিৰাম ৰংহাঙে লাডাখক উদাহৰণ হিচাপে লৈ অসমৰ ভিতৰতে কাৰ্বি আংলঙক স্বায়ত্তশাসিত ৰাজ্য হিচাপে গঠন কৰাৰ বাবে মঙলবাৰে দাবী জনায়।

নতুন দিল্লীত আজি গৃহমন্ত্ৰী অমিত শ্বাহে কাৰ্বি আংলং আৰু ডিমাছা ভৱনৰ আধাৰশিলা স্থাপন কৰা অনুষ্ঠানত গৃহমন্ত্ৰী শ্বাহৰ উপস্থিতিতে এই দাবী উত্থাপন কৰে ৰংহাঙে।

এই সম্পৰ্কত ৰংহাঙে অমিত শ্বাহৰ হাতত এখন স্মাৰকপত্ৰও প্ৰদান কৰে।

‘‘আমি বিচাৰো কেন্দ্ৰ চৰকাৰে নিশ্চয় অনুচ্ছেদ ২৪৪(এ)ৰ প্ৰয়োগ কৰিব’’-ৰংহাঙে কয়।

ৰংহাঙে পুনৰ তিনি দশকৰ পৰা কাৰ্বি সকলে স্বায়ত্ত শাসিত ৰাজ্য বিচাৰি দাবী জনাই অহা বুলি উল্লেখ কৰি স্বায়ত্ত শাসিত ৰাজ্যৰ মৰ্য্যদা তেওঁলোকৰ অধিকাৰ বুলি কয়।

প্ৰধান মন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহৰ নেতৃত্বত তেওঁলোকৰ এই আশা পুৰণ হ’ব বুলিও আশা ব্যক্ত কৰে কাৰ্বি আংলং স্বায়ত্ত শাসিত পৰিষদৰ মুখ্য কাৰ্য্যবাহী সদস্যগৰাকীয়ে।

কেন্দ্ৰীয় চৰকাৰৰ লাডাখক কেন্দ্ৰীয় শাসিত ৰাজ্য হিচাপে ঘোষণা কৰাৰ সিদ্ধান্তক আদৰণি জনাই ৰংহাঙে তেওঁলোকেও চৰকাৰৰ পৰা একেধৰণৰ মনোযোগ আশা কৰে বুলি মন্তব্য কৰে।

আনহাতে, এই সম্পৰ্কত মত ব্যক্ত কৰি স্বায়ত্ত শাসিত জিলা সমষ্টিৰ সাংসদ হৰেন সিং বে’ই ভাৰতীয়  সংবিধানত স্বায়ত্ত শাসিত ৰাজ্য গঠন কৰাৰ বিষয়ে উল্লেখ আছে বুলি কয়।

‘‘অনুচ্ছেদ ২৪৪(এ)ৰ অধীনত চৰকাৰে স্বায়ত্ত শাসিত ৰাজ্য গঠন কৰিব পাৰে’’-সাংসদ গৰাকীৰ বক্তব্য।