দামোদৰদেৱ সত্ৰৰ সত্ৰাধিকাৰৰ মৃত্যুত মুখ্য মন্ত্ৰীৰ শোক প্ৰকাশ

বৰপেটা জিলাৰ পাটৱাউসী দামোদৰদেৱ সত্ৰৰ সত্ৰাধিকাৰ গুৰুকৃষ্ণ গোস্বামীৰ বিয়োগত মুখ্য মন্ত্ৰী সৰ্বানন্দ সোণোৱালে গভীৰ শোক প্ৰকাশ কৰিছে।

আজি এক শোকবাৰ্তাত মুখ্য মন্ত্ৰী সোণোৱালে কয় যে দামোদৰদেৱ সত্ৰৰ সত্ৰাধিকাৰ গুৰুকৃষ্ণ গোস্বামীয়ে জীৱনকালত সমাজৰ বিভিন্ন শ্ৰেণীৰ লোকৰ মাজত আধ্যাত্মিক চেতনাবোধ জাগ্ৰত কৰাৰ উপৰি জনসাধাৰণৰ মাজত শান্তি-সম্প্ৰীতি আৰু ভাতৃত্ববোধ অক্ষুণ্ণ ৰখাৰ দিশত নিৰৱচ্ছিন্নভাৱে অৰিহণা যোগাইছিল।

তদুপৰি বহু কেইখন আধ্যাত্মিক গ্ৰন্থৰ ৰচনা কৰি তেখেতে আমাৰ সাহিত্য জগতলৈও বিশেষ অৰিহণা আগবঢ়াই গৈছে। প্ৰয়াত সত্ৰাধিকাৰ গুৰুকৃষ্ণ গোস্বামীৰ বিয়োগ আমাৰ আধ্যাত্মিক তথা সমাজ জীৱনৰ বাবে অপুৰণীয়া ক্ষতি বুলিও মুখ্যমন্ত্ৰীয়ে কয়।

তেওঁ গোস্বামীৰ বিদেহ আত্মাৰ চিৰশান্তিৰ বাবে ভগৱানৰ ওচৰত প্ৰাৰ্থনা জনোৱাৰ উপৰি শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰে।