১৩ বছৰৰ বিৰতিৰ মূৰত পুনৰ পথত দৌৰিবলৈ সাজু ‘বাজাজ চেতক’

‘হামাৰা বাজাজ’ শব্দটোৱে হয়তো সকলোকে বাজাজ চেতকৰে কৰা মধুৰ যাত্ৰাৰ সেই দিনবোৰলৈ মনত পেলায় দিয়ে। এসময়ৰ ভাৰতৰ ৰাস্তা-ঘাটে সৰ্বাধিক চলা স্কুটাৰ আছিল এই চেতক।

দুচকীয়া বাহনক প্ৰত্যাহ্বান জনাবলৈ ইতিমধ্যে সাজু হৈছে বাজাজ। কিয়নো কম্পেনিটোৱে অতি শীঘ্ৰে সকলোৰে পচন্দৰ এই স্কুটাৰখন ভাৰতৰ বজাৰত পুনৰ মুকলি কৰিব।

কম্পেনিৰ ফালৰ পৰা জানিব পৰা অনুসৰি এইবাৰ সম্পূৰ্ণ নতুন ষ্টাইলত আহিব চেতক। স্কুটাৰখন অটো গিয়াৰ কৰাৰ সম্ভাৱনাই সৰ্বাধিক।

ইফালে একাংশৰ মতে বাজাজৰ এই নতুন স্কুটাৰখন দেখিবলৈ প্ৰায় আগৰ দৰেই হ’ব। কেৱল মডাৰ্ণ লুক এটা দিয়াৰ বাবে স্কুটাৰখনত এলয় হুইল, আগত আৰু পিছত ডিস্ক ব্ৰেক আৰু হেড লাইটটো এল ই ডি দিয়াৰ সম্ভাৱনা আছে।

বাজাজৰ এই নতুন ইলেক্ট্ৰিক বাহনখনৰ সবিশেষ এতিয়াও ভালদৰে জানিব পৰা হোৱা নাই যদিও কম্পেনিয়ে ইয়াক ছেপ্তেম্বৰ মাহতে মুকলি কৰাৰ পৰিকল্পনাত আছে। কিন্তু মুকলিৰ তাৰিখ এই পৰ্যন্ত খাটাং হোৱা নাই।

উল্লেখ্য যে ২০০৬ চনত ৰাহুল বাজাজৰ পুত্ৰ ৰাজীৱ বাজাজে কম্পেনিৰ দায়িত্ব লোৱাৰ পাছতে স্কুটাৰৰ উৎপাদন বন্ধ কৰি দিছিল।

নৱ প্ৰজন্মৰ মাজত স্কুটাৰৰ পৰিৱৰ্তে বাইকৰ চাহিদা বৃদ্ধি পোৱাৰ প্ৰতি লক্ষ্য কৰি স্কুটাৰৰ নিৰ্মাণ বন্ধ কৰাৰ সিদ্ধান্ত লৈছিল ৰাজীৱ বাজাজে। কিন্তু পুত্ৰৰ এই সিদ্ধান্তক মুঠেও সমৰ্থন জনোৱা নাছিল পিতৃ ৰাহুল বাজাজে।

মন কৰিব লগীয়া যে ভাৰতত চাৰিচকীয়া বাহনৰ তুলনাত দুচকীয়া বাহনৰ বিক্ৰী বেছি। শেহতীয়াভাৱে দুচকীয়া বাহনৰ ক্ষেত্ৰতো মটৰ চাইকেলৰ তুলনাত স্কুটাৰৰ বিক্ৰী অভাৱনীয়ভাৱে বৃদ্ধি পাইছে। আৰু এই বিলাক কাৰকৰ প্ৰতি লক্ষ্য ৰাখিয়েই বাজাজে নতুনকৈ বজাৰত মুকলি কৰিবলৈ সাজু হৈছে স্কুটাৰ।