সংবাদমেলত সাংসদ প্ৰদ্যুৎ বৰদলৈ : ভাৰতৰ অৰ্থনীতি নিম্নগামী হৈছে; জুইক ফটাকানিৰে ঢাকিব পৰা নাযায়

নিৰ্মলা সীতাৰমণ মিছা কথা কোৱাত পাকৈত বুলি মন্তব্য কৰি ভাৰতৰ সাম্প্ৰতিক অৰ্থনীতিক লৈ বিত্ত মন্ত্ৰীগৰাকীয়ে কৰা দাবীক আজি মিথ্যা আখ্যা দিয়ে কংগ্ৰেছ সাংসদ প্ৰদ্যুৎ বৰদলৈয়ে। সাংসদজনে আজি জি এছ ৰোডস্থিত ৰাজীৱ ভৱনত এখন সংবাদমেল দিয়ে।

কেন্দ্ৰীয় বিত্ত মন্ত্ৰীগৰাকীয়ে ২৯ আগষ্টত ভাৰতৰ অৰ্থনীতি পৃথিৱীৰ ভিতৰতে দ্ৰুত বিকাশশীল আখ্যা দিছিল।

“সীতাৰমণ মিছা কথা কোৱাত পাকৈত। ভাৰতৰ অৰ্থনীতি যদি ২.৩ ত্ৰিলিয়ন ডলাৰৰ পৰা ৫ ত্ৰিলিয়ন ডলাৰলৈ যায় তেন্তে বিজেপিৰ মুখত ফুল চন্দন পৰক”, কটাক্ষ বৰদলৈৰ।

তেওঁ ১৯৫১ চনৰ পিছত ভাৰতৰ অৰ্থনীতি অলপ অলপকৈ বৃদ্ধি হৈছিল। কিন্তু যোৱা দুই বছৰত ভাৰতৰ অৰ্থনীতি নিম্নগামী হৈছে বুলি দাবী কৰে। আৰু এইদৰে যদি অৰ্থনীতিৰ বিকাশ নহয় তেন্তে সংকট আহি পৰিব বুলিও মন্তব্য কৰে।

“জুইক ফটাকানিৰে ঢাকি ৰাখিব পৰা নাযায়”, কংগ্ৰেছ সাংসদগৰাকীয়ে কয়।

তাৰোপৰি সংবাদমেলত তেওঁ দেশত কৰ্মসংস্থানৰ ক্ষেত্ৰখনত সৃষ্টি হোৱা পৰিস্থিতি সন্দৰ্ভত মন্তব্য কৰি কয়, “৩ লাখ মানুহে কৰ্ম সংস্থাপন হেৰুৱাইছে অটোমোবাইল ছেক্টৰত। ৩১০টা ডীলাৰ বন্ধ হৈ গৈছে। ছফ্টৱেৰৰ ছেক্টৰত ৭০০ কৰ্মচাৰীক চাটাই কৰা হৈছে আৰু এই পদ্ধতিৰে চলি থাকিলে বস্ত্ৰ উদ্যোগত ৩ কোটি লোকৰ চাকৰি নাইকিয়া হ’ব”।

আম্বানি, আদানিৰ জি টিভি, টাইমছ অব ইণ্ডিয়া, ৰিপাব্লিক টিভিকে ধৰি কিছুমান ৰাষ্ট্ৰীয় সংবাদ মাধ্যমে দেশৰ অৰ্থনৈতিক দুৰৱস্থাৰ বিষয়ে বাতৰি প্ৰকাশ নকৰে বুলিও অভিযোগ বৰদলৈৰ।

বিজেপি চৰকাৰে ৰিজাৰ্ভ বেংকৰ সাঁচতীয়া ভাণ্ডাৰৰ পৰা ১.৭৬ লাখ কোটি টকা উলিয়াই নিব বিচাৰিছে বুলি কৈ সেই টকা ক’ত খৰচ কৰিব কেন্দ্ৰীয় বিত্ত মন্ত্ৰীৰ পৰা উত্তৰ বিচাৰে।

আনহাতে ৰাজ্যৰো অৰ্থনৈতিক স্থিতিত প্ৰশ্ন তুলি সাংসদজনে কয়, “সৰ্বানন্দ সোণোৱালক সুধিছো, ডেৰ বছৰ আগতে এডভাণ্টেইজ আছাম পাতিলে, এবছৰত এক লাখ কোটি টকা বিনিয়োগ হ’ব বুলি কৈছিল। কিন্তু ক’ত গ’ল সেই প্ৰতিশ্ৰুতি? ক’ত বিনিয়োগ হৈছে জনাওক। মই জনাত উদ্যোগৰ পৰিসৰ সংকুচিত হৈহে গৈ আছে। কিমানক কৰ্মসংস্থাপন দিলে? কিমান উদ্যোগত ধন বিনিয়োগ কৰিলে? ইমান ডাঙৰ চলনা কেতিয়াও আগতে হোৱা নাছিল।”

সংবাদমেলত এন আৰ চি বিষয়ত দলৰ স্থিতি দাঙি ধৰে সাংসদজনে। তেওঁ কয় কংগ্ৰেছ দলে শুদ্ধ এন আৰ চি প্ৰকাশ হোৱাটো বিচাৰে।

“বিজেপি দলে কেইদিনমান আগৰ পৰা পশ্চাদমুখী কাম-কাজ কৰিবলৈ চেষ্টা কৰিছে। শেহতীয়াকৈ প্ৰতীক হাজেলাক আক্ৰমণ কৰাৰ লগতে উচ্চতম ন্যায়ালয়ৰ ভূমিকাতো প্ৰশ্ন উত্থাপন কৰিব বিচাৰিছে”, শাসকীয় দলটোৰ বিৰুদ্ধে বৰদলৈৰ অভিযোগ।

তেওঁ প্ৰদেশ কংগ্ৰেছে এন আৰ চিৰ পৰা নাম বাদ পৰা প্ৰকৃত ভাৰতীয় মানুহক আইনী সাহায্য প্ৰদান কৰিব বুলি জানিবলৈ দিয়ে।

“নাম বাদ পৰা দুখীয়া ভাৰতীয়ক বিনা পইচাত সহায় কৰাৰ বাবে ব্যৱস্থা হাতত লৈছো। বিজেপিয়ে ধৰ্মীয় মেৰুকৰণৰ জৰিয়তে এটা বিশেষ সম্প্ৰদায়ৰ মানুহক সহায় কৰিব বিচাৰিছে। কংগ্ৰেছে হিন্দু-মুছলমানকে ধৰি জাতি-ধৰ্ম-বৰ্ণ নিৰ্বিশেষে নাম বাদ পৰা ভাৰতীয়ক সহায়ৰ হাত আগ বঢ়াম।” বৰদলৈয়ে কয়।