প্ৰৱঞ্চনাৰ অভিযোগত গ্ৰেপ্তাৰ ষ্টেট বেংক অব ইণ্ডিয়াৰ ডেপুটি মেনেজাৰ

প্ৰৱঞ্চনাৰে দুজন গ্ৰাহকৰ একাউণ্টৰ পৰা ধন উলিয়াই নিয়াৰ অভিযোগত ষ্টেট বেংক অব ইণ্ডিয়াৰ এগৰাকী ডেপুটি মেনেজাৰক গ্ৰেপ্তাৰ কৰা হৈছে।

অৰুণাচল প্ৰদেশ আৰক্ষীয়ে গ্ৰেপ্তাৰ কৰা বিষয়াগৰাকীয়ে আল’ত বেংকটোৰ গ্ৰাহকৰ একাউণ্টৰ পৰা প্ৰৱঞ্চনাৰে ধন সৰকাইছিল।

অভিযোগ অনুসৰি, ষ্টেইট বেংক অব ইণ্ডিয়াৰ ডেপুটি মেনেজাৰ বিকাশ ৰঞ্জন ৰায়ে য়ানায়া কোজেৰ একাউণ্টৰ পৰা ৪ লাখ টকা আৰু আন এগৰাকী গ্ৰাহক মাৰকিৰ মায়িৰ একাউণ্টৰ পৰা ২.২ লাখ টকা উলিয়াইছিল।

বেংকৰ শাখাটোৰ একাউণ্টেণ্ট তথা কেচিয়াৰৰ দায়িত্বত থকা ৰায়ে গ্ৰাহকে নজনাকৈ অবৈধভাৱে উইড্ৰল ভাউচাৰৰ জৰিয়তে অকৃতৰ্ত্বশীলভাৱে ধনখিনি উলিয়াইছিল।

কোজেই যোৱা ২ জুলাইত তেওঁৰ একাউণ্টৰ পৰা ৪০,০০০ টকা উলিয়াইছিল, কিন্তু আল’ৰ জেনেৰেল হস্পিটেলৰ কৰ্মচাৰীগৰাকীয়ে তেওঁৰ পাছবুকটো আপডেট কৰাৰ সময়ত একাউণ্টৰ পৰা ৪ লাখ টকা হৰণলুকি হোৱা বুলি জানিব পাৰি হতভম্ব হৈ পৰে।

তেওঁ যেতিয়া বিষয়টো ৰায়ৰ দৃষ্টিগোচৰ কৰে, তাৰ পাছত বেংকৰ বিষয়াগৰাকীয়ে যোৱা ১৭ জুলাইত গ্ৰাহকজনৰ একাউণ্টত ৩,৬০,০০০ টকা জমা কৰিছিল যদিও পৰৱৰ্তী দিনটোত আকৌ সেইখিনি উঠাই লয়।

ৰায়ে আল’ৰ পৰা যোৱা ১৮ জুলাইত পলায়ন কৰাৰ আগতে মায়িৰ একাউণ্টৰ পৰা ২,২০,০০০ টকা ট্ৰেন্সফাৰ কৰি লৈ যায়।

আৰক্ষীয়ে অভিযুক্ত ৰায়ক তেওঁৰ গৃহৰাজ্য মেঘালয়ৰ পৰা গ্ৰেপ্তাৰ কৰিছে আৰু বিতং তদন্তৰ বাবে চাৰিদিনৰ জিম্মাত ৰাখিছে।

ৰায় মেঘালয়ৰ পশ্চিম গাৰোপাহাৰ জিলাৰ হাৱাখানা গাঁৱৰ বাসিন্দা।