অসম বন্ধ আহ্বান বজ্ৰং দলৰ, “কাঞ্চনজংঘা”ক লৈ চিন্তাত জুবিন ফেন

ৰাষ্ট্ৰীয় বজ্ৰং দলে সদ্যপ্ৰকাশিত এন আৰ চি বাতিলৰ দাবীত অহা ৬ ছেপ্তেম্বৰত অসম বন্ধৰ আহ্বান কৰিছে।

কিন্তু, সেইদিনাই জুবিন গাৰ্গৰ বহুচৰ্চিত চিনেমা “কাঞ্চনজংঘা”য়ো মুক্তি পোৱাৰ কথা। ফলত চিন্তাত পৰিছে জুবিন ফেনকে ধৰি প্ৰথম দিনাই চিনেমাখন চাম বুলি আশা পালি থকা দৰ্শক।

৬ ছেপ্তেম্বৰৰ পুৱা ৫ বজাৰ পৰা ১২ ঘণ্টাৰ বাবে বন্ধটোৰ আহ্বান কৰা হৈছে। বজ্ৰং দলৰ এই বন্ধলৈ সতীৰ্থ সংগঠন আন্তঃৰাষ্ট্ৰীয় হিন্দু পৰিষদেও সমৰ্থন আগবঢ়াইছে।

পুৱা বৰ্তমানৰ এন আৰ চি বাতিলৰ দাবী কৰা হিন্দু সংগঠনটোৱে পুনৰ নতুনকৈ এই পঞ্জী তৈয়াৰ কৰাৰ দাবী জনাইছে।

আৰু নতুন এন আৰ চিত নাগৰিকত্ব নিৰ্ধাৰণ/ বিদেশী চিনাক্তকৰণৰ ভিত্তিবৰ্ষ অসম চুক্তি নিৰ্দেশিত ১৯৭১ৰ পৰিৱৰ্তে ১৯৫১ চন কৰাৰ বাবে তেওঁলোকে দাবী জনাইছে।

আনহাতে, একে সময়তে শৰণাৰ্থী হিন্দুৰ নাগৰিকত্ব সুনিশ্চিত কৰাৰ বাবেও সংগঠনটোৱে দাবী জনাইছে।

‘‘১৯৫১ চনৰ পৰা ১৯৭১ চনলৈকে যিসকল হিন্দু শৰণাৰ্থী অসমলৈ আহিল, সেইসকলক অসমত ৰাখিব লাগে আৰু ১৯৭১ৰ পাছত অহা সকলো হিন্দু শৰণাৰ্থীক সমগ্ৰ ভাৰতে ভগাই ল’ব লাগে,” নৰ্থইষ্ট নাওক জনায় ৰাষ্ট্ৰীয় বজ্ৰং দলৰ ৰাজ্যিক সাধাৰণ সম্পাদক ৰবীন ভূঞাই।