ৰাজ্যৰ এজন প্ৰভাৱশালী মন্ত্ৰী চুপাৰি ছিণ্ডিকেটত জড়িত : অখিল গগৈ

ৰাজ্যত বৃহৎ চুপাৰি ছিণ্ডিকেটৰ সৈতে এজন প্ৰভাৱশালী মন্ত্ৰী জড়িত আছে বুলি আজি দাবী কৰিছে কৃষক মুক্তিৰ নেতা অখিল গগৈয়ে।

কৃষক মুক্তিৰ নেতাজনৰ মতে, আৰক্ষীৰ উপৰি এই প্ৰভাৱশালী মন্ত্ৰীজন জড়িত থকা বাবেই গুৱাহাটীত ২৭খন চুপাৰিভৰ্তি ট্ৰাক জব্দ কৰা ঘটনাটোত আৰক্ষীয়ে নৰম ধাৰাত গোচৰ ৰুজু কৰিছে।

ট্ৰাককেইখন যোৱা ২১ আগষ্টত গুৱাহাটীত জব্দ কৰা হৈছিল আৰু সেইকেইখন এতিয়াও আই এছ বি টিত আছে। তালৈ স্থানান্তৰ কৰাৰ পূৰ্বে ভালেকেইদিন ট্ৰাককেইখন জালুকবাৰীত ৰখাই থোৱা হৈছিল।

চুপাৰি ছিণ্ডিকেইটৰ বিভিন্ন গোপন দিশ উন্মোচিত কৰি অহা অখিল গগৈয়ে ৬ ছেপ্টেম্বৰত এই বিষয়ত সংবাদমেল দি আৰক্ষী আৰু প্ৰভাৱশালী মন্ত্ৰীৰ বাবেই গোচৰৰ ধাৰা নৰম হোৱা বুলি অভিযোগ তোলে।

গগৈৰ মতে, গোচৰটোত অসম আৰক্ষীয়ে ভাৰতীয় দণ্ডবিধিৰ ১২০বি, ৪২০, ৪৬৮ আৰু ৪৭১ ধাৰা লগাইছে। অৰ্থাৎ ইয়াত অপৰাধমূলক ষড়যন্ত্ৰ, প্ৰৱঞ্চনা, জালিয়াতি আদিৰ ধাৰা সংযোগ কৰা হৈছে।

“কিন্তু এই চুপাৰিবোৰ বাৰ্মিজ আৰু ইণ্ডোনেছিয়াৰ চুপাৰি। গতিকে ইয়াত বৈদেশিক বাণিজ্য জড়িত হৈ আছে, যিটোৰ বাবে কাষ্টম এক্ট ১৯৬২-ৰ ১৩৫ ধাৰা সংযুক্ত কৰিব লাগিব”, কৃষক মুক্তিৰ ৰাজ্যিক কাৰ্য্যালয়ত দিয়া সংবাদমেলত গগৈয়ে কয়।

কিন্তু এই ধাৰাত যাতে গোচৰটো নাযায়, তাৰ বাবেই আৰক্ষীয়ে কৃষক মুক্তিয়ে দিয়া এজাহাৰখন সম্পূৰ্ণকৈ পঞ্জীয়ন নকৰি সেইখনক আৰক্ষীয়ে নিজে ৰুজু কৰা গোচৰৰ সৈতে সাঙুৰি ল’বলৈ চেষ্টা কৰিছে বুলি গগৈয়ে নিজৰ অনুমান হোৱা বুলি কয়।

গগৈৰ আন এটা গুৰুতৰ অভিযোগ, “কেৱল বৈদেশিক বাণিজ্যই নহয়। ইয়াৰ সৈতে অবৈধ ড্ৰাগছ, অবৈধ মাৰণাস্ত্ৰও অনা হয়।”