মালেয়েছিয়া, থাইলেণ্ডত ভাৰতৰ হৈ পেঞ্চাক চিলাট খেলিব কৃষ্ণাইৰ চন্দন ৰাভাই

অসমৰ খেলুৱৈয়ে এটাৰ পিছত আন এটা সন্মান কঢ়িয়াই অনাৰ পিছত এইবাৰ অসমৰ ৭ গৰাকী পেঞ্চাক চিলাট খেলুৱৈয়ে প্ৰতিনিধিত্ব কৰিব ভাৰতীয় দলক।

মালেয়েছিয়া আৰু থাইলেণ্ডত অনুষ্ঠিত হ’ব লগীয়া প্ৰতিযোগিতাৰ বাবে ভাৰতীয় দলত স্থান পোৱা ৭ গৰাকী খেলুৱৈৰ ভিতৰত আছে গোৱালপাৰা জিলাৰ কৃষ্ণাই শালপাৰাৰ চন্দন ৰাভা।

চন্দনৰ এই সাফল্যত উৎফুল্লিত হৈ পৰিছে পৰিয়ালৰ লগতে গাঁওবাসী। সকলোৰে এটাই আশা, চন্দনে ভাল খেল প্ৰদৰ্শন কৰি দেশ তথা অসমলৈ কঢ়িয়াই আনিব সুনাম।

কিন্তু এতিয়া টকাৰ অভাৱত চিন্তিত হৈ পৰিছে চন্দনৰ লগতে পৰিয়ালৰ লোক। কিয়নো মালেয়ছিয়া আৰু থাইলেণ্ড ভ্ৰমণকালত চন্দনক প্ৰয়োজন লক্ষাধিক টকাৰ ৷

গাঁওবাসীয়ে কিছু পৰিমানে দান বৰঙনিৰে সহায় কৰিছে যদিও সেয়া পৰ্যাপ্ত নহয়। সেয়ে পৰিয়ালৰ লোকৰ লগতে অঞ্চলবাসীয়ে অসমবাসীৰ পৰা সহায় বিচাৰিছে।

আৰ্থিক ভাৱে সহায় কৰিব বিচৰা লোক সকলে এছ বি আই দুধনৈ শাখা IFSC code: SBIN0012260 a/c No 35002484127 ত প্ৰদান কৰিব পাৰিব ধন।

উল্লেখ্য যে প্ৰথমে ২৬ ছেপ্তেম্বৰত মালেয়েছিয়াত হ’ব ল’গা আন্তঃৰাষ্ট্ৰীয় পেঞ্চাক চিলাট চেম্পিয়নশ্বিপত অংশগ্ৰহণ কৰিব অসমৰ ৭ গৰাকীসহ ভাৰতীয় দলটোৱে আৰু তাৰ পিছতে বিশ্ব পেঞ্চাক চিলাট চেম্পিয়নশ্বিপত অংশ ল’ব দলটোৱে।