উত্তৰ-পূবৰ লোকক হিন্দী শিকাব চৰকাৰে, অমিত শ্বাহৰ ঘোষণা

ভাৰতৰ গৃহ মন্ত্ৰী অমিত শ্বাহে কৈছে যে উত্তৰ-পূবৰ লোকসকলক হিন্দী শিকোৱাৰ বাবে তেওঁ ব্যৱস্থা গ্ৰহণ কৰিব।

নতুন দিল্লীত শনিবাৰে “হিন্দী দিৱস”ৰ এক অনুষ্ঠানত তেওঁ এই ঘোষণা কৰিছে।

“মই শেহতীয়াকৈ গুৱাহাটীলৈ গৈছিলো। মই গম পালো যে উত্তৰ-পূবৰ প্ৰায় সকলো ৰাজ্যই হিন্দী ভাষা কয়…মোক কোৱা হৈছিল যে তাত হিন্দী ভাষাটো যোগাযোগৰ মাধ্যমৰূপে ব্যৱহৃত হয়। সেয়ে, উত্তৰ-পূবৰ লোকসকলক হিন্দীৰ সঠিক প্ৰশিক্ষণ আৰু পাঠ দিয়াৰ বাবে আমি পদক্ষেপ গ্ৰহণ কৰিম,” বিজ্ঞান ভৱনত আয়োজিত অনুষ্ঠানটোত দিয়া ভাষণত শ্বাহে কয়।

হিন্দীক ভাৰতৰ “ৰাষ্ট্ৰভাষা”ৰূপে ঘোষণা কৰাৰ ওপৰতো তেওঁ গুৰুত্ব আৰোপ কৰিছে।

“ভাৰতত বহুত ভাষা আছে। সকলো ভাৰতীয় ভাষাৰে নিজা তাৎপৰ্য্য আছে। কিন্তু এটা ভাষা লাগে যিটোৱে সমগ্ৰ দেশবাসীক একগোট কৰিব পাৰে,” শ্বাহে কয়।

হিন্দীক ৰাষ্ট্ৰভাষা কৰিব লাগে বুলি শ্বাহে কৰা মন্তব্যক বহুলোকে চোকা সমালোচনা কৰিছে।

ডি এম কেৰ মুৰব্বী এম কে ষ্টালিনে কৈছে যে হিন্দী ৰাষ্ট্ৰভাষা হ’ব নোৱাৰে আৰু গৃহ মন্ত্ৰীগৰাকীৰ বক্তব্যই “ভাৰতৰ ঐক্যত প্ৰভাৱ পেলাব পাৰে”।

ষ্টালিনে কয়, “হিন্দী জাপি দিয়াৰ বিৰুদ্ধে আমি ধাৰাবাহিকভাৱে প্ৰতিবাদ জনাই আহিছো। অমিত শ্বাহে আজি কৰা মন্তব্যই আমাক জোকাৰি গৈছে। তেওঁ বিবৃতিটো উঠাই লোৱাটো আমি বিচাৰিছো।”

আন বহু দলেও দাক্ষিণাত্যৰ নেতাজনৰ দৃষ্টিভংগিৰ প্ৰতিধ্বনি তুলিছে।

সংবিধান সভাই ১৯৪৯ চনৰ ১৪ ছেপ্তেম্বৰত বিভাগীয় ভাষাৰূপে দিয়া স্বীকৃতিৰ স্মৃতিৰূপে প্ৰতি বছৰে এই দিনটো “হিন্দী ৰাজভাষা দিৱস”ৰূপে পালন কৰা হয়।