দেশৰ ২১খন নতুন কেন্দ্ৰীয় বিদ্যালয়ৰ তালিকাত অসমৰ গোলাঘাট, হাফলং আৰু তামুলপুৰ

দেশত ২১খন নতুন কেন্দ্ৰীয় বিদ্যালয় হ’ব। দেশৰ কেইবাখনো ৰাজ্যত স্থাপন কৰা হ’ব এই কেন্দ্ৰীয় বিদ্যালয়কেইখন। শুকুৰবাৰে ১৩খন কেন্দ্ৰীয় বিদ্যালয়ৰ নতুন ভৱনৰ উদ্বোধন কৰা হয়।

নতুনকৈ স্থাপন হ’বলগীয়া ২১খন কেন্দ্ৰীয় বিদ্যালয়ৰ মাজত আছে অসমৰো তিনিখন কেন্দ্ৰীয় বিদ্যালয়।

অসমত স্থাপন হ’বলগীয়া তিনিখন কেন্দ্ৰীয় বিদ্যালয় স্থাপন কৰা হ’ব গোলাঘাট, হাফলং আৰু তামুলপুৰত।

কেন্দ্ৰীয় মানৱ সম্পদ উন্নয়ন বিভাগৰ মন্ত্ৰী ৰমেশ পোখৰিয়ালে শুকুৰবাৰে শাস্ত্ৰী ভৱনত থকা মানৱ সম্পদ উন্নয়ন মন্ত্ৰালয়ৰ কাৰ্যালয়ৰ পৰা ভিডিঅ’ কনফাৰেন্সিঙৰ জৰিয়তে কেন্দ্ৰীয় বিদ্যালয়ৰ ১৩টা নতুন ভৱনৰ উদ্বোধন কৰে।

কেন্দ্ৰীয় মন্ত্ৰীগৰাকীয়ে লগতে ৬টা নতুন ভৱনৰ আধাৰশিলাও স্থাপন কৰে। এই ১৯খন কেন্দ্ৰীয় বিদ্যালয় দেশৰ ১২খন ৰাজ্যত স্থাপন কৰা হৈছে।

প্ৰথমবাৰৰ বাবে কেন্দ্ৰীয় মানৱ সম্পদ উন্নয়ন বিভাগৰ মন্ত্ৰীয়ে এনেদৰে ইমান বৃহৎ সংখ্যাত নতুন ভৱনৰ উদ্বোধন বা আধাৰশিলা স্থাপন কৰে।

৩০০কোটিকৈও অধিক টকা ব্যয় সাপেক্ষে প্ৰস্তুত কৰি তোলা এই আঁচনিত ২০ হাজাৰতকৈও অধিক শিশু উপকৃত হ’ব।

অনুষ্ঠানত কেন্দ্ৰীয় মন্ত্ৰী পোখৰিয়ালে কয় যে কেন্দ্ৰীয় বিদ্যালয় ব্যৱস্থাই আজি দেশত উৎকৃষ্টতাৰ নিদৰ্শন হৈ পৰিছে আৰু আন্ত:ৰাষ্ট্ৰীয় পৰ্যায়তো নিজৰ পৰিচয় দাঙি ধৰিবলৈ সক্ষম হৈছে।

পোখৰিয়ালে সকলো কেন্দ্ৰীয় বিদ্যালয়ৰ শিক্ষক, অভিভাৱক, শিক্ষাৰ্থীসকলৰ লগতে স্থানীয় সাংসদ, বিধায়ক আৰু আন জন প্ৰতিনিধিসকলক অভিনন্দন জনাই অচিৰেই কেন্দ্ৰীয় বিদ্যালয়সমূহ এক বিশ্বস্ত সংস্থা হৈ উঠিব বুলি আশা ব্যক্ত কৰে।

উল্লেখযোগ্য যে বৰ্তমান গোটেই দেশতে মুঠ ১,২২৫খন কেন্দ্ৰীয় বিদ্যালয় আছে য’ত প্ৰায় ১২,৯২,৭৬৭গৰাকী শিক্ষাৰ্থী অধ্যয়ন কৰি আছে।