চহিদ-নিৰ্য্যাতিতৰ পৰিয়ালৰ সদস্যৰ সংস্থাপনক লৈ ল’ৰা-ধেমালিৰ অভিযোগ চৰকাৰৰ বিৰুদ্ধে

চহিদ-নিৰ্য্যাতিতৰ পৰিয়ালক লৈ মুখ্য মন্ত্ৰী আৰু অসম চুক্তি ৰূপায়ণ বিভাগে ল’ৰা-ধেমালি কৰাৰ অভিযোগ উত্থাপন কৰিছে সদৌ অসম চহিদ-নিৰ্য্যাতিত পৰিয়াল পৰিষদে।

দেওবাৰে গুৱাহাটী প্ৰেছ ক্লাবত এখন সংবাদমেল সম্বোধন কৰি পৰিষদে অসম আন্দোলনৰ চহিদ আৰু নিৰ্য্যাতিতৰ পৰিয়ালৰ সদস্যক সংস্থাপন আৰু নিযুক্তিৰ নামত চৰকাৰে চৰম হেমাহি কৰা বুলি অভিযোগ তোলে।

“চহিদ-নিৰ্য্যাতিতৰ পৰিয়ালৰ সদস্যক কৰ্মসংস্থাপন, স্থায়ী নিযুক্তি দিয়াৰ ক্ষেত্ৰত অসম চুক্তি ৰূপায়ণ বিভাগে চৰম হেমাহি কৰিছে। আমাৰ ভৱিষ্যতক লৈ তেওঁলোকে ল’ৰা-ধেমালি কৰিছে আৰু দেখিও নেদেখা ভাও ধৰি মুখ্য মন্ত্ৰী সৰ্বানন্দ সোণোৱাল নিমাত হৈ আছে”, পৰিষদৰ মুখ্য সম্পাদক মাণিক চন্দ্ৰ দেৱনাথে কয়।

অসম চুক্তি ৰূপায়ণ বিভাগে ২০১৪ চনৰ পৰা বৰ্তমানলৈকে কেনেদৰে অৱহেলা কৰি আছে তাৰ বৰ্ণনা কৰি তেওঁ কয়, “২০১৪ চনৰ ১৮ ফেব্ৰুৱাৰিত সেই সময়ৰ অসম চুক্তি ৰূপায়ণ বিভাগৰ মন্ত্ৰী হিমন্ত বিশ্ব শৰ্মাৰ নিৰ্দেশত বিভাগটোৱে চহিদ-নিৰ্য্যাতিত পৰিয়ালৰ উত্তৰাধিকাৰীক কৰ্মসংস্থাপন দিব বুলি Govt letter-1AA-65/2012/164 যোগে সকলো জিলাৰ উপায়ুক্তলৈ পত্ৰ প্ৰেৰণ কৰিছিল, য’ত চহিদ পৰিয়ালৰ উত্তৰাধিকাৰীৰ নাম সংগ্ৰহৰ বাবে কোৱা হৈছিল।”

তেওঁ লগতে কয়, “চহিদ-নিৰ্য্যাতিতৰ পৰিয়ালৰ কৰ্ম সংস্থাপন সন্দৰ্ভত ২০১৫ চনত সেই সময়ৰ বিধায়ক যাদৱ চন্দ্ৰ ডেকাই প্ৰশ্ন কৰাত তদানীন্তন অসম চুক্তি ৰূপায়ণ মন্ত্ৰী ভূমিধৰ বৰ্মনে উত্তৰত ৰাজ্য চৰকাৰৰ অধীনৰ ২১টা বিভাগত মুঠ ৫১৯জন চহিদ-নিৰ্য্যাতিতৰ পৰিয়ালৰ সদস্যক নিযুক্তি দিয়া আৰু ৮৯০জনক নিযুক্তি দিবলৈ বাকী আছিল বুলি উল্লেখ কৰিছিল”।

তাৰ পিছত চহিদ-নিৰ্য্যাতিত পৰিয়ালৰ উক্ত ৮৯০জনৰ এজনেও বৰ্তমানলৈকে নিযুক্তি নাপালে বুলি গুৰুতৰ অভিযোগ তোলে দেৱনাথে।

“২০১৬ চনত মুঠ ৩১৫গৰাকী চহিদ-নিৰ্য্যাতিত পৰিয়ালৰ সদস্যই ৰাজ্য চৰকাৰৰ ২১টা বিভাগত আৱেদন কৰিছিল। মুখ্য মন্ত্ৰী সৰ্বানন্দ সোণোৱালেও ২০১৬ চনৰ ১ জুলাইত এই আৱেদনকাৰীসকলক নিযুক্তি দিয়া হ’ব বুলি নতুন বিজেপি চৰকাৰখনৰ ১০০ দিনীয়া কৰ্মসূচীত অন্তৰ্ভুক্ত কৰিছিল আৰু বাতৰিকাকতৰ প্ৰথম পৃষ্ঠাৰ লগতে ইলেক্ট্ৰনিক মাধ্যমতো এই বাতৰি প্ৰকাশ কৰিছিল”, দেৱনাথে কয়।

তাৰ পিছতো যোৱা ৩ বছৰে এই কাম আগ নবঢ়াত এইসকলক নিযুক্তি প্ৰদানৰ দাবীত চলিত বৰ্ষৰ ৩১ জুলাইত মুখ্য মন্ত্ৰী সৰ্বানন্দ সোণোৱালক পৰিষদে স্মাৰকপত্ৰ প্ৰদান কৰে।

তেওঁ আৰু কয়, “আমাৰ স্মাৰক পত্ৰৰ ভিত্তিতে সৰ্বানন্দ সোণোৱালে অসম চুক্তি ৰূপায়ণ সমিতিক পত্ৰযোগে (পত্ৰ নং HMA-19/39/2018-Political (A) 231 (ECF63784)) নিযুক্তিৰ কাম আৰম্ভ কৰিবলৈ নিৰ্দেশ দিছিল যদিও তাতো লেহেমীয়া গতি দেখিবলৈ পোৱা গৈছে। অসম চুক্তি ৰূপায়ণ বিভাগে ৰাজ্য চৰকাৰৰ প্ৰতিটো বিভাগত চহিদ-নিৰ্য্যাতিত পৰিয়ালে কৰা চাকৰিৰ আৱেদনৰ তালিকা সংগ্ৰহ কৰি অহা ডিচেম্বৰ মাহৰ ভিতৰত নিযুক্তি প্ৰক্ৰিয়া সম্পূৰ্ণ কৰক”।

অনথ্যা অহা ৩১ ডিচেম্বৰৰ পাছত চহিদ-নিৰ্য্যাতিত পৰিয়ালৰ সকলো সদস্যই পেটত গামোচা বান্ধি আমৰণ অনশনত বহিব, দেৱনাথে কয়।