ফেইচবুকত সাংসদক উদ্দেশ্যি আপত্তিজনক মন্তব্য কৰা যুৱকক মণিপুৰৰ পৰা গ্ৰেপ্তাৰ

ছ’চিয়েল মিডিয়াযোগে ত্ৰিপুৰাৰ প্ৰতিমা ভৌমিক নামৰ এগৰাকী সাংসদক উদ্দেশ্যি আপত্তিজনক মন্তব্য দিয়াৰ অপৰাধত এজন যুৱকক ৰাজ্যখনৰ আৰক্ষীয়ে গ্ৰেপ্তাৰ কৰিছে।

মণিপুৰৰ উখৰুল জিলাৰ পৰা গ্ৰেপ্তাৰ কৰা যুৱকজনক আজি আগৰতলালৈ লৈ অহা হয়। যুৱকজনক অনুপম সিনহা বুলি চিনাক্ত কৰিছে।

ঘটনা সন্দৰ্ভত পশ্চিম আগৰতলা আৰক্ষী থানাৰ আৰক্ষী বিষয়া দেবপ্ৰসাদ ৰয়ে সংবাদ মাধ্যমৰ আগত কয় যে অভিযুক্ত অনুপম সিনহা আচলতে ত্ৰিপুৰাৰ খোৱাই জিলাৰ কল্যাণপুৰৰ নিবাসী। ১০ অক্টোবৰত তেওঁৰ বিৰুদ্ধে এটা গোচৰ ৰুজু হৈছিল আৰু সেই দিনটোতে তেওঁ ৰাজ্যৰ পৰা নোহোৱা হৈছিল।

আৰক্ষীয়ে মোবাইল নেটৱ’ৰ্কৰ জৰিয়তে লোকজন মণিপুৰত বাহৰ পাতি থকা বুলি জানিব পাৰে। লগে লগে ইন্সপেক্টৰ নিত্যানন্দ সৰকাৰৰ নেতৃত্বত আৰক্ষীৰ এটা দল মণিপুৰলৈ যায় আৰু যোৱা ১২ অক্টোবৰ অৰ্থাৎ শনিবাৰে অনুপম সিনহাক আটক কৰে।

দেবপ্ৰসাদ ৰয়ে যুৱকজনৰ ফেইচবুক একাউণ্ট বন্ধ কৰি দিয়াৰ লগতে আৰক্ষীয়ে জেৰা চলাই আছে বুলিও জানিবলৈ দিয়ে। তদুপৰি সোমবাৰে আদালতত হাজিৰ কৰোৱা হ’ব যুৱকজনক।

উল্লেখ্য যে ইয়াৰ পূৰ্বেও ত্ৰিপুৰাত বিজেপি চৰকাৰ গঠন হোৱাৰ পিছতে মুখ্য মন্ত্ৰী বিপ্লব দেবৰ বিৰুদ্ধে ফে’চবুকত আপত্তিজনক মন্তব্য কৰি কেইবাগৰাকীও যুৱক গ্ৰেপ্তাৰ হৈছিল।