কাজিৰঙাৰ নতুন ডি এফ অ’ হিচাপে ৰমেশ গগৈৰ কাৰ্যভাৰ গ্ৰহণ; পূৰ্বৰ ডি এফ অ’ ৰোহিনী বল্লভ শইকীয়ালৈ বিদায় সম্বৰ্ধনা

কাজিৰঙা ৰাষ্ট্ৰীয় উদ্যান আৰু পূব অসম বন্যপ্ৰাণী সংমণ্ডৰ ডি এফ অ’ হিচাবে মঙলবাৰে আনুষ্ঠানিকভাৱে যোগদান কৰে ৰমেশ গগৈয়ে।

অসম বন সেৱা বিষয়া ৰমেশ গগৈয়ে আজি পূৰ্বৰ ডি এফ অ’ ৰোহিনী বল্লভ শইকীয়াৰ পৰা আনুষ্ঠানিকভাৱে কাৰ্যভাৰ গ্ৰহণ কৰে।

কাজিৰঙাত যোগদানৰ পূৰ্বে ৰমেশ গগৈ মঙলদৈ বন সংমণ্ডলত কৰ্মৰত আছিল।

আনহাতে, দায়িত্বভাৰ গ্ৰহণ পাছতেই ৰমেশ গগৈয়ে কহঁৰাত আয়োজিত ৰোহিনী বল্লভ শইকীয়াৰ বাবে আয়োজন কৰা এখন সম্বৰ্ধনা সভাত অংশগ্ৰহণ কৰে।

অনুষ্ঠানত কাজিৰঙা ৰষ্ট্ৰীয় উদ্যানৰ সঞ্চালক পি শিৱকুমাৰ, সঞ্চালকৰ পৰিবাৰ সত্যপ্ৰিয়া শিৱকুমাৰ, ভাৰতীয় বন সেৱা বিষয়া ডিম্পী বৰা আৰু শোণিতপুৰৰ ডি এফ অ’ ৰঞ্জিত কোঁৱৰে অংশ গ্ৰহণ কৰে।

অনুষ্ঠানত আৰ টি আই কৰ্মী ৰোহিত চৌধুৰী, সমাজ কৰ্মী অনিমেষ শইকীয়া, শোণিতপুৰ আৰু গোলাঘাটৰ অনাৰেৰী ৱাইল্ড লাইফ ৱাৰ্ডেন ক্ৰমে সৌৰভ বৰকটকী আৰু উত্তম শইকীয়াও উপস্থিত থাকে।

অনুষ্ঠানত বোকাখাত আৰু কাজিৰঙাৰ বিভিন্ন দল সংগঠনৰ লগতে কাজিৰঙাৰ বিষয়া কৰ্মচাৰীৰ তৰফৰ পৰা ৰোহিনী বল্লভ শইকীয়াক স্নেহপত্ৰ, ফুলাম গামোছা, সঁফুৰা আদিৰে বিদায় সম্বৰ্ধনা জনোৱা হয়।

লগতে নৱ নিযুক্ত ডি এফ অ’ ৰমেশ গগৈকো দল সংগঠন সমূহে একেখন সভাতে আদৰণি জনায়।

কাজিৰঙা ৰাষ্ট্ৰীয় উদ্যানৰ সৈতে দীৰ্ঘদিনৰ পৰা জড়িত হৈ থাকি কাম কৰি যোৱা ৰোহিনী বল্লভ শইকীয়াই বিদায় সম্বৰ্ধনা গ্ৰহণ কৰি কিছু পৰিমাণে আৱেগিক হৈ পৰে।