পাকিস্তানৰ পাছত ভাৰতৰ নতুন মানচিত্ৰক লৈ নেপালৰ বিৰোধিতা

ভাৰত চৰকাৰে জাৰি কৰা দেশৰ নতুন ৰাজনৈতিক মানচিত্ৰক লৈ পাকিস্তানৰ পাছত এইবাৰ নেপালে বিৰোধিতা প্ৰকাশ কৰিছে।

ভাৰতৰ দ্বাৰা প্ৰকাশিত নতুন ৰাজনৈতিক মানচিত্ৰত কালপানীক ভাৰতৰ ভূখণ্ডৰ অন্তুৰ্ভূক্ত কৰাকলৈ নেপালে অসন্তুষ্টি ব্যক্ত কৰে।

নতুন দিল্লী আৰু কাঠমাণ্ডুৰ মাজত সীমা বিবাদ সন্দৰ্ভত আলোচনা অব্যাহত আছে।

নেপালৰ বিদেশ মন্ত্ৰ্যালয়ে বুধবাৰে এক বিজ্ঞপ্তি যোগে কালাপানীক নেপালৰ অভিন্ন অংগ হিচাপে উল্লেখ কৰাৰ লগতে দেশখনে ইয়াৰ আন্তঃৰাষ্ট্ৰীয় সীমা সুৰক্ষাৰ স্বাৰ্থত মিত্ৰ দেশৰ সৈতে কুটনৈতিক বাৰ্তালাপ আৰম্ভ কৰিব বুলি কয়।

নেপালৰ বিদেশ মন্ত্ৰ্যালয়ৰ তৰফৰ পৰা জাৰি কৰা বিজ্ঞপ্তিটোত নেপাল আৰু ভাৰতৰ বিদেশ মন্ত্ৰীদ্বয়ৰ নেতৃত্বত গঠিত সমিতিক সীমা বিবাদ সমাধান কৰাৰ বাবে দায়িত্ব অৰ্পন কৰা হৈছে বুলি উল্লেখ কৰিছে।

‘‘দুয়োখন দেশৰ মাজত থকা সীমা বিবাদ দ্বিপাক্ষীয় বৈঠক আৰু সন্মতি ক্ৰমে সমাধান কৰা উচিত, এইক্ষেত্ৰত কোনোধৰণৰ একপক্ষীয় সিদ্ধান্ত নেপাল চৰকাৰে গ্ৰহণ নকৰে,’’ নেপালে নিজৰ বিবৃতিত কয়।

উল্লেখযোগ্য যে, ভাৰত চৰকাৰে শনিবাৰে জম্মু-কাশ্মীৰ আৰু লাডাখক লৈ দেশৰ নতুন মানচিত্ৰ প্ৰকাশ কৰিছিল।

মানচিত্ৰখনত কালাপানীক উত্তৰাখণ্ডৰ পিথোৰাগড় জিলাৰ অন্তৰ্ভূক্ত হিচাপে দেখুওৱা হৈছে।