সোণোৱাল বিৰাল তপস্বী, চিণ্ডিকেট চলাবলৈ দি ৰাসলীলাত ব্যস্ত আছে: কংগ্ৰেছ

কংগ্ৰেছে মঙলবাৰে অসমৰ মুখ্য মন্ত্ৰী সৰ্বানন্দ সোণোৱালক “বিৰাল তপস্বী”ৰূপে অভিহিত কৰি কৈছে তেওঁ চিণ্ডিকেট চলাবলৈ দি নিজকে ৰাসত ব্যস্ত ৰাখিছে।

“তেওঁৰ ছত্ৰছায়াত ৰাজ্যত কয়লা, গৰু, পাণ, চুপাৰিৰ চিণ্ডিকেটৰাজ চলি আছে।…মুখ্য মন্ত্ৰীয়ে এফালে চিণ্ডিকেট চলাবলৈ দি কৃষ্ণভক্ত হৈ ৰাসলীলাতে ব্যস্ত আছে,” অসম প্ৰদেশ কংগ্ৰেছ সমিতিৰ মুখপাত্ৰ অপূৰ্ব ভট্টাচাৰ্য্যই গুৱাহাটীত সংবাদমেলত কয়।

মুখ্য মন্ত্ৰীক পোনপটীয়াকৈ সমালোচনা কৰি বিৰোধী নেতাজনে কয় যে অসমৰ চিণ্ডিকেট চক্ৰই এতিয়া চৰকাৰৰ লগতে বিজেপি দলৰো সমৰ্থন লাভ কৰিছে।

“বিজেপি দলৰো আশীৰ্বাদ লাভ কৰিছে চিণ্ডিকেট চক্ৰই। বিজেপি দলৰ সভাপতি ৰঞ্জিত দাসৰ আশীৰ্বাদ চিণ্ডিকেটৰ লগত নিহিত হৈ আছে। ইমানদিনে আমি ভাবি আহিছিলো মুখ্য মন্ত্ৰী সৰ্বানন্দ সোণোৱালৰ ছত্ৰছায়াত কেন্দ্ৰীয় মন্ত্ৰীৰ আশীৰ্বাদত আৰু স্থানীয় বিধায়কৰ নেতৃত্বত মাৰ্ঘেৰিটা বা কৰিমগঞ্জত চিণ্ডিকেটৰাজ চলিছে,” ভট্টাচাৰ্য্যই কয়।

আত্মপক্ষৰ সমৰ্থনত “সুনীল গুৰুং” নামৰ এজন ব্যক্তিৰ নাম উল্লেখ কৰি কংগ্ৰেছ নেতাজনে কয় যে অসম চৰকাৰৰ খনি বিভাগে গুৰুং “কয়লাৰ চোৰাং ব্যৱসায়ত জৰিত” বুলি কৈছিল।

কিন্তু, ভট্টাচাৰ্য্যৰমতে, গুৰুং এতিয়া সভাপতি ৰঞ্জিত দাসৰ লগতে আন বহুকেইজন বিজেপি নেতাৰ “নয়নৰ মণি”।

গুৰুঙকে ধৰি মুঠ ১৯জন ব্যক্তিক কয়লা চোৰাং বেহাৰ লগত জৰিত বুলি খনি বিভাগে তিনিচুকীয়াৰ উপায়ুক্ত আৰু আৰক্ষী অধীক্ষকক অভিযোগ দাখিল কৰিছিল, ভট্টাচাৰ্য্যই কয়।

“গোচৰ দিয়াৰ পাছতো কিয় বৰ্তমানলৈকে প্ৰশাসনে কোনো ধৰণৰ ব্যৱস্থা গ্ৰহণ কৰা নাই?”

মাৰ্ঘেৰিটাৰ সুনীল গুৰুঙে বিজেপিৰ ৰঞ্জিত দাস আৰু আন কেইগৰাকীমান বিধায়কৰ সৈতে উঠা ফটো ভট্টাচাৰ্য্যই সংবাদমেলত প্ৰদৰ্শন কৰে।