৪০ বছৰীয়া ‘WALK’ইং ‘MAN’ৰ স্মাৰ্ট নতুন খোজ

৪০ বছৰীয়া ‘WALK’ইং ‘MAN’এ পেলাবলৈ লৈছে এক নতুন ‘স্মাৰ্ট’ খোজ।

সময়ৰ সৈতে খোজ মিলাই আইকনিক ৱকমেনৰ নতুন সংস্কৰণ মুকলি কৰা হৈছে।

NW-A100TPS নামেৰে বাৰ্লিনৰ আই এফ এ টেকনলজি শ্ব’ত যোৱা চেপ্তেম্বৰত মুকলি কৰা ৱকমেনে লৈ আহিছে ৱাই ফাই, টাচ্চস্ক্ৰীন দিচপ্লে’ আৰু ব্ল্যুতুথ কানেক্তিভিটি।

এন্দ্ৰইদ প্ৰযুক্তিৰ সমৰ্থনত চলিব লগা ৱকমেনটোৰ দাম বৰ্তমান ৫৯৯ অষ্ট্ৰেলিয়ান ডলাৰ (ভাৰতীয় মূল্যত প্ৰায় ৩০ হাজাৰ টকা)।

ভাৰতৰ বজাৰত এই ৱকমেন কেতিয়া উপলব্ধ হ’ব জানিব পৰা হোৱা নাই, কিন্তু আশা কৰিব পাৰি দাম সংবেদনশীল ভাৰতীয়ৰ বাবে ইয়াক নিশ্চয় কম দামত আগবঢ়োৱা হ’ব।

চ’নিৰ ৱকমেন ছিৰিজৰ আন দিজিটেল মিউজিক প্লে’য়াৰসমূহ ভাৰতীয় বজাৰত এতিয়াও উপলব্ধ।

জাপানী কোম্পানি চ’নিৰ এই ৱকমেন ভাল চাউণ্ডৰ বাবে প্ৰখ্যাত আছিল।

আই পদ আৰু স্মাৰ্ট ফ’নৰ আগমনৰ লগে লগে ৱকমেন এৰাপৰলীয়া হ’লেও এতিয়াও তাৰ ক্লাছিক পৰিচয় বাহাল আছে।

১৯৭৯ চনত চ’নিয়ে পৰ্তেবল কেছেট প্লে’য়াৰৰ ৰূপত ৱকমেন আৰম্ভ কৰিছিল।