ৰাজ্যিক বিজেপিৰ অত্যাধুনিক ছয় মহলীয়া বিলাসী ব্যয়বহুল কাৰ্য্যালয়ৰ নিৰ্মাণকাৰ্য্য আৰম্ভ

বান-গৰাখহনীয়া, নিৱনুৱাকে ধৰি অন্য বহু সমস্যাই বছৰ বছৰ ধৰি অসমৰ জনসাধাৰণক জুৰুলা কৰি থকাৰ সময়ত অসম ৰাজ্যিক বিজেপিৰ বিলাসী মুখ্য কাৰ্য্যালয়ৰ আৰ্হি প্ৰকাশ পাইছে।

বুধবাৰে গুৱাহাটীৰ বশিষ্ঠত ৰাজ্যিক বিজেপিৰ বিলাসী আৰু ব্যয়বহুল নতুন মুখ্য কাৰ্য্যালয়ৰ নিৰ্মাণ়ৰ কামৰ শুভাৰম্ভণি কৰা হয়।

মুখ্য মন্ত্ৰী সৰ্বানন্দ সোণোৱালে নতুনকৈ নিৰ্মাণ হ’বলগীয়া কাৰ্য্যালয়টোৰ আধাৰশিলা স্থাপন কৰে।

ৰাজ্যিক বিজেপিৰ নিৰ্মাণ হ’বলগীয়া কাৰ্য্যালয়টো ৬ মহলীয়া হোৱাৰ লগতে তলৰ মহলাত অত্যাধুনিক পাৰ্কিং থাকিব বুলি জানিব পৰা গৈছে।

তাৰোপৰি, ডিজিটেল লাইব্ৰেৰী, আই.টি চেল, অতিথি কোঠা, বৃহৎ সভা কক্ষ, সৰু সভা কক্ষ ইত্যাদি সংযোজিত হ’ব নতুন ভৱনটোত।

আনহাতে, ২০২১ চনৰ বিধান সভা নিৰ্বাচনৰ কাম-কাজ নতুনকৈ স্থাপন হ’বলগীয়া অত্যাধুনিক কাৰ্য্যালয়ৰ পৰা পৰিচালিত হ’ব বুলি সংবাদ মাধ্যমৰ আগত জানিবলৈ দিয়ে ৰাজ্যিক বিজেপিৰ সভাপতি ৰঞ্জিত দাসে। প্ৰাক্তন প্ৰধান মন্ত্ৰী অটল বিহাৰী বাজপেয়ীৰ নামেৰেই নতুন কাৰ্য্যালয়ৰ নামাকৰণ কৰা হ’ব।

লগতে জিলা সমূহতো কেন্দ্ৰীয় বিজেপিৰ নেতৃত্বত জিলা কাৰ্য্যালয়ৰ নিৰ্মাণৰ বাবে চিন্তা চৰ্চা চলাই থকা হৈছে বুলি দাসে কয়।

আজিৰ আধাৰশিলা স্থাপন অনুষ্ঠানত বিজেপিৰ ৰাজ্যিক সভাপতি ৰণজিৎ দাসৰ লগতে মন্ত্ৰী নৱ কুমাৰ দলে দিশপুৰ সমষ্টিৰ বিধায়ক অতুল বৰা বিধায়ক  ডা° নোমল মমিন আৰু ৰাজ্যিক সাংগঠনিক সম্পাদক ফনীন্দ্ৰ শৰ্মা উপস্থিত থাকে।