হাতী-মানুহৰ সংঘাত প্ৰৱণ অঞ্চলৰ বাবে ১২টা বিশেষ দল গঠনৰ প্ৰস্তুতি বন বিভাগৰ

ৰাজ্যত ব্যাপক হাৰত বৃদ্ধি পোৱা বনৰীয়া হাতী আৰু মানুহৰ সংঘাত ৰোধৰ বাবে ৰাজ্যৰ বিয়াগোম বন বিভাগে বিশেষ পৰিকল্পনা হাতত লোৱা পৰিলক্ষিত হৈছে।

বিভাগটোৱে বনৰীয়া হাতী-মানুহৰ সংঘাত প্ৰৱণ এলেকা সমূহত বনৰীয়া হাতীক নিয়ন্ত্ৰণ আৰু তদাৰক কৰিবৰ বাবে ১২টা বিশেষ দল প্ৰস্তুত কৰিব।

ইয়াৰ প্ৰতিটো বিশেষ দলক বিভাগে দুখনকৈ গাড়ীৰ উপৰি প্ৰতিজন বনৰক্ষীৰ হাতে-হাতে বন্দুক, টৰ্চ, আতচবাজী আদি প্ৰদান কৰা হ’ব।

লক্ষ্যণীয়ভাবে, অহা এসপ্তাহ অথবা দহ দিনৰ ভিতৰত আনুষ্ঠানিক ভাৱে এই বিশেষ বাহিনীটো মুকলি কৰি দিয়াৰ বিষয়ে মঙলবাৰে বিয়লি চামগুৰিৰ চালপাৰাত সংবাদ মাধ্যমক জানিবলৈ দিয়ে বন মন্ত্ৰী পৰিমল শুক্লবদ্যই।

উল্লেখযোগ্য যে, মঙলবাৰে বিয়লি চালপাৰাত বন বিভাগৰ উদ্যোগত অনুষ্ঠিত এখন ফুটবল প্ৰতিযোগিতাৰ চুড়ান্ত খেলত উপস্থিত থকাৰ সময়ত বন মন্ত্ৰী পৰিমল শুক্লবদ্যয়ে এই কথা ঘোষণা কৰে।

ইফালে ৰাজ্যৰ যিকোনো অভয়াৰণ্যৰ নাইবা ৰাষ্ট্ৰীয় উদ্যানৰ বাহিৰত বন বিভাগে গঁড়ক সুৰক্ষা দিয়াত ব্যৰ্থ হোৱাৰ বাবেই পূৰ্বে গঁড় হত্যা হৈছিল বুলি এক আজব মন্তব্য প্ৰদান কৰে বনমন্ত্ৰী গৰাকীয়ে।