শিক্ষয়িত্ৰীৰ হত্যাকাণ্ড; মণিপুৰী বিদ্ৰোহীৰ শাস্তিৰ দাবীত উত্তাল ম্যানমাৰৰ ৰাজপথ

এগৰাকী শিক্ষয়িত্ৰীক হত্যা কৰাক কেন্দ্ৰ কৰি মণিপুৰী বিদ্ৰোহী গোটৰ বিৰুদ্ধে আজি ম্যানমাৰৰ চিন ৰাজ্যত তীব্ৰ প্ৰতিবাদ সাব্যস্ত হয়।

ডিম লুন মাং নামৰ শিক্ষয়িত্ৰী গৰাকীৰ হত্যাকাৰীক কঠোৰ শাস্তি দিয়াৰ দাবীত চিন ৰাজ্যৰ টোনজাং নগৰত ৫০০তকৈ অধীক লোক ৰাজপথলৈ ওলাই আহে।

উল্লেখযোগ্য যে টোনজাং নগৰৰ অন্তৰ্গত টুইভেলজাং গাঁৱত যোৱা ১৭ নৱেম্বৰত ডিম লুন মাঙৰ মৃতদেহ উদ্ধাৰ হৈছিল, তেওঁক নৃশংভাৱে হত্যা কৰা হৈছিল।

প্ৰতিবাদকাৰীসকলে শীঘ্ৰে অভিযুক্তক গ্ৰেপ্তাৰ কৰাৰ দাবী তোলে। জানিব পৰা মতে বিনোদ (৪০) নামৰ অভিযুক্ত হত্যাকাৰী গৰাকীৰ মণিপুৰী বিদ্ৰোহী সংগঠন মেইটে-কাঠেৰ সৈতে ঘণিষ্ঠ সম্পৰ্ক আছে।

বিনোদৰ বাপেক মণিপুৰী হোৱাৰ বিপৰীতে মাক ম্যানমাৰৰ। হত্যাকাণ্ডৰ পিছতে তেওঁ মণিপুৰলৈ পলাই যায় বুলি জানিব পৰা গৈছে।

প্ৰতিবাদকাৰীসকলে আজি দোষীক শাস্তি দিয়াৰ লগতে উত্তৰ চিন ৰাজ্যৰ কাবাউ উপত্যকাত অবৈধভাৱে থিতাপি লৈ অহা বিদ্ৰোহী গোট মেইটে-কাঠেক শীঘ্ৰে ম্যানমাৰৰ পৰা উলিয়াই পঠোৱাৰ দাবী জনায়।

বৰ্তমান মণিপুৰ-ম্যানমাৰ সীমান্তত উত্তেজনাই বিৰাজ কৰি আছে। মণিপুৰৰ উগ্ৰপন্থীয়ে ম্যানমাৰৰ ভৌগলিক সীমাৰ ভিতৰত সোমাই কিদৰে ইমান মুকলিকৈ স্থানীয় লোকৰ ওপৰত সন্ত্ৰাস চলাব পাৰিছে বুলি বাৰ্মিজ মানৱ অধিকাৰ গোটসমূহে প্ৰশ্ন তুলিছে।

আনহাতে মণিপুৰী বিদ্ৰোহী গোটৰ পৰা ভেটী লৈ অহাৰ ফলত তেওঁলোকৰ কাৰ্যকলাপৰ ওপৰত নজৰ নাৰাখে বুলি ম্যানমাৰ সেনা টাটমাড’ৰ বিৰুদ্ধে দীৰ্ঘদিনিয়া অভিযোগ আছে।

২০০১ চনত টাটমাড’ৱে ১৯২ গৰাকী মেইটি বিদ্ৰোহীক গ্ৰেপ্তাৰ কৰিছিল যদিও আটাইকে পিছত মুকলি কৰি দিয়ে। ইয়াৰ ভিতৰত কেইগৰাকীমান শীৰ্ষ পৰ্য্যায়ৰ মণিপুৰী বিদ্ৰোহীয়ো আছিল।