শিৱসাগৰত অব্যাহত আছে কা’ৰ বিৰোধী আন্দোলন; দিহানামেৰে ব্যতিক্ৰমী প্ৰতিবাদ

শিৱসাগৰত আজি ‘ভক্তিৰস লোকসংস্কৃতি প্ৰচাৰ প্ৰসাৰ পৰিষদ’ৰ উদ্যোগত আৰু শিৱসাগৰ ৰাইজৰ সহযোগত কা’ বাতিলৰ দাবীত সুৰ বাহিনীয়ে এক ব্যতিক্ৰমী প্ৰতিবাদ সাব্যস্ত কৰে।

পৰিষদৰ অৰ্ধ শতাধিক মহিলাই চহৰৰ মুক্তিনাথ চাৰিআলিস্থিত বৰাট জুৱেলাৰীৰ সন্মুখত দিনৰ ১২ বজাৰ পৰা অবিৰতভাৱে দিহানাম পৰিবেশন কৰি কা’ৰ বিৰুদ্ধে উত্তাল প্ৰতিবাদ সাব্যস্ত কৰে।

কৃষক মুক্তি সংগ্ৰাম সমিতিৰ শিৱসাগৰ জিলা সমিতিয়েও কা’ৰ বিৰুদ্ধে জিলা উপায়ুক্তৰ কাৰ্যালয়ৰ সন্মুখত এক প্ৰতিবাদী কাৰ্যসূচী ৰূপায়ণ কৰি অখিল গগৈক গ্ৰেপ্তাৰ কৰি শাৰিৰিক আৰু মানসিক অত্যাচাৰ কৰাৰ প্ৰতিবাদত আৰু শীঘ্ৰে তেওঁক বিনাচৰ্তে মুকলি কৰি দিয়াৰ দাবী জনায়।

ইয়াৰ উপৰি আছুৰ দিচাং ধাইআলি আঞ্চলিকৰ আহ্বানত অনুষ্ঠিত গণ সত্যাগ্ৰহত স্থানীয় কেইবা শতাধিক পুৰুষ মহিলাই আখৈফুটীয়া ঘাটৰ পৰা  জয়ৰাপাৰ ৰাজহুৱা খেলপথাৰলৈ এক বৃহৎ সমদল উলিয়ায়।

আনহাতে সদৌ অসম কৰ্মচাৰী পৰিষদৰ আহ্বানত সদৌ অসম প্ৰশাসন কৰ্মচাৰী সন্থাৰ শিৱসাগৰ জিলা সমিতি, কৰ্মচাৰী পৰিষদ, মণ্ডল কানুনগো সন্মিলনীয়ে জিলা উপায়ুক্তৰ কাৰ্যালয়ৰ সন্মুখত প্ৰতিবাদ কৰে। কৰ্মচাৰী সন্থাৰ কৰ্মবিৰতি ফলত আজি শিৱসাগৰৰ সকলো চৰকাৰী বিভাগৰ কামকাজ অচল হৈ পৰে।

সমান্তৰালভাৱে অসম সাহিত্য সভাৰ উদ্যোগতো শিৱসাগৰ নগৰৰ লক্ষ্মীনাথ বেজবৰুৱা উদ্যানত গণ প্ৰতিবাদৰ আয়োজন কৰা হয়। কা’ বিৰোধী গীত মাত কবিতা আৰু ছবিৰে ৰাইজে এই প্ৰতিবাদত অংশগ্ৰহণ কৰে আৰু কা’ বাতিল নকৰিলে অসমীয়া ৰাইজক চৰকাৰে গুলীয়াই মাৰিবলৈ আহ্বান জনায়।

উক্ত কাৰ্যসূচীৰ লগতে আজি সাহিত্য সভাই অম্বিকা গিৰি ৰাইচৌধুৰীৰ জন্ম দিৱস জাতীয় চেতনা দিৱস ৰূপে পালন কৰে।