যেনে পিতৃ তেনে পুত্ৰ; ৰাহুল দ্ৰাবিড়ৰ পুত্ৰৰ দ্বিশতকীয় ইনিংছেৰে চমক

ভাৰতীয় দলৰ প্ৰাক্তন নিৰ্ভৰযোগ্য মিডল অৰ্ডাৰ বেটছমেন ৰাহুল দ্ৰাবিড়ৰ পুত্ৰ সমিত দ্ৰাবিড়ে ৰাজ্যিক স্তৰৰ অনুৰ্ধ-১৪ ক্ৰিকেট প্ৰতিযোগিতাত দৰ্শনীয় প্ৰদৰ্শনেৰে দ্বিশতৰাণ অৰ্জন কৰে।

উপ-সভাপতি একাদশৰ হৈ খেলা চৈধ্য বছৰীয়া সমিতে ধাৰৱাদ মণ্ডলৰ বিপক্ষে প্ৰথম ইনিংছত ২৫৬ টা বলত ২০১ ৰাণ সংগ্ৰহ কৰে।

দ্বিশতকীয় ইনিংছটোত সমিতে ২২ টা বাউণ্ডেৰী কোবায়।

আনহাতে, দ্বিতীয় ইনিংছতো ক্ৰিকেটাৰ গৰাকীয়ে ৯৪ ৰাণ সংগ্ৰহ কৰি অপৰাজিত হৈ ৰয়।

দ্বিতীয় ইনিংছত প্ৰতিভাৱান ক্ৰিকেটাৰ গৰাকীয়ে ২৬ ৰাণ দি ৩ টা উইকেটো দখল কৰে। অবশ্যে খেলখন ড্ৰ ৰূপে সামৰণি পৰে।

উল্লেখযোগ্য যে, ভাৰতীয় ক্ৰিকেটত দ্যা ৱাল হিচাপে পৰিচিত ৰাহুল দ্ৰাবিড়ৰ পুত্ৰ সমিত ইয়াৰ পূৰ্বেও নিজৰ বেটিং শৈলীৰ বাবে বাতৰিৰ শিৰোনামালৈ আহিছিল।

বৰ্তমান ৰাষ্ট্ৰীয় ক্ৰিকেট একাডেমীৰ মুখ্য নিৰ্দেশকৰ দায়িত্বত থকা ৰাহুল দ্ৰাবিড়ে ভাৰতীয় ক্ৰিকেটৰ যুৱ ক্ৰিকেটাৰ সকলৰ বাবে আদৰ্শ প্ৰশিক্ষক হিচাপে পৰিগণিত হৈছে।

পিতৃৰ পদাংক অনুসৰণ কৰি সমিতেও দলৰ মিডল অৰ্ডাৰত নিৰ্ভৰযোগ্য ইনিংছ খেলি নিজৰ প্ৰতিভাৰ প্ৰমাণ দিবলৈ আৰম্ভ কৰিছে।