২৩ বছৰীয়া যুৱতীয়ে হত্যা কৰিলে এজন ৫৪ বছৰীয়া পুৰুষক

শাৰিৰীক নিৰ্যাতনৰ বলি হৈ অহা এগৰাকী ২৩ বছৰীয়া যুৱতীয়ে চেকৰ ওৰফে আম্মান চেকৰ নামৰ এজন ৫৪ বছৰীয়া পুৰুষক নিৰ্মমভাৱে হত্যা কৰা ঘটনাই চাঞ্চল্যৰ সৃষ্টি কৰিছে দক্ষিণ ভাৰতৰ চেন্নাইত।

যোৱা সোমবাৰে নিশা চেন্নাইৰ ৱাছেৰমেনপেটৰ এখন খেলপথাৰত লোকজনৰ মৃতদেহ উদ্ধাৰ হোৱাৰ পিছতে ঘটনাৰ অনুসন্ধান চলাই আৰক্ষীয়ে হত্যাকাণ্ডটোৰ সৈতে জৰিত থকাৰ অভিযোগত যুৱতীগৰাকীক গ্ৰেপ্তাৰ কৰে।

জানিব পৰা মতে যোৱা চাৰিবছৰ ধৰি লোকজনে যুৱতীগৰাকীক শাৰিৰীকভাৱে নিৰ্যাতন চলাই আহিছিল আৰু অৱশেষত ইয়াৰ পৰা পৰিত্ৰাণ পাবলৈকে যুৱতীগৰাকীয়ে লোকজনক হত্যা কৰে।

হত্যাৰ বলি হোৱা লোকজনৰ জীয়েকৰ সৈতে বন্ধুত্ব আছিল যুৱতীগৰাকীৰ। সেই সূত্ৰে চিনাকী হৈ লোকজনে যোৱা চাৰি-পাঁচবছৰৰ পৰা বিভিন্ন ধৰণে শাৰিৰীক তথা মানসিক নিৰ্যাতন চলাই আহিছিল।

শেহতীয়াকৈ যুৱতীগৰাকীয়ে বিবাহপাশত আবদ্ধ হ’বলৈ ওলোৱাৰ খবৰ জানিব পাৰি লোকজনে যুৱতীগৰাকীৰ লগতে পৰিয়ালৰ লোকক বিভিন্ন ভয়-ভাবুকি প্ৰদান কৰে। যদিহে যুৱতীগৰাকীয়ে অন্যৰ সৈতে বিয়াত বহে তেন্তে তেওঁ কিছু আপত্তিজনক ফটো ভাইৰেল কৰাৰো ভাবুকি দিছিল।

এনোবোৰ কাৰ্যত অতিষ্ঠ হৈ অৱশেষত যুৱতীগৰাকীয়ে যোৱা সোমবাৰে লোকজনক গুৰুত্বপূৰ্ণ কথা থকা বুলি কৈ ৱাছেৰমেনপেটলৈ মাতি পঠিয়ায়। লোকজন আহি পোৱাত যুৱতীগৰাকীয়ে তেওঁক আশ্চৰ্যকৰ কৰাৰ অজুহাতত চকু দুটা বন্ধ কৰিবলৈ দি বেয়াকৈ আক্ৰমণ কৰি হত্যা কৰে।

ইতিমধ্যে হত্যাকাণ্ডৰ সংক্ৰান্তত নিউ ৱাছেৰমেনপেট আরক্ষীয়ে গোচৰ ৰুজু কৰাৰ লগতে যোৱা মঙলবাৰে যুৱতীগৰাকীক গ্ৰেপ্তাৰ কৰে।