আলফা (স্বা)ত যোগদান কৰাৰ যো-জা চলাওঁতেই ৬জনকৈ নাবালকক আটক বৰডুমচা আৰক্ষীৰ

উজনি অসমৰ তিনিচুকীয়া জিলাৰ বৰডুমচা আৰক্ষী চকীৰ অধীনৰ ৰিতু কঠালগুৰি, কুজুপথাৰ আৰু মিহলিৰিতু অঞ্চলৰ পৰা বৰডুমচা আৰক্ষীয়ে আজি সন্ধিয়া ৬ গৰাকী নাবালক তথা ছাত্ৰক আটক কৰে। আটাকাধীন ৬ গৰাকীয়ে কুজুপথাৰ শংকৰদেৱ উচ্চতৰ মাধ্যমিক বিদ্যালয়ৰ ছাত্ৰ।

আৰক্ষী সূত্ৰই জনোৱা মতে আটকাধীন ছাত্ৰ তথা নাবালককেইজনে বৃহস্পতিবাৰে অৰ্থাৎ আজি তেওঁলোকৰ পৰীক্ষা শেষ হোৱাৰ পিছতে আলফা (স্বা)ত যোগদান কৰাৰ বাবে যোজা চলাইছিল।

“ছাত্ৰকেইজনে আলফা (স্বা)ত আনুষ্ঠানিকভাৱে যোগদান কৰা আৰু ট্ৰেইনিঙৰ বাবে অহা জানুৱাৰী মাহত যোৱাৰ কথা আছিল।” আৰক্ষীয়ে এই কথা ছাত্ৰকেইজনৰ ছচিয়েল মিডিয়াত হোৱা বাৰ্তালাপৰ পৰা জানিব পাৰিছে বুলি কয়।

বৰডুমচা আৰক্ষী চকীৰ ভাৰপ্ৰাপ্ত বিষয়াগৰাকীয়ে কয় যে, ‘আমাৰ হাতত ছাত্ৰকেইজনৰ বিৰুদ্ধে আইনী ব্যৱস্থা ল’বলৈ পূৰ্বতে যথেষ্ট পৰিমাণৰ প্ৰমাণ আছিল। কিন্তু আমি তেওঁলোকে পৰীক্ষা সম্পূৰ্ণ কৰাটো বিচাৰিছিলো যিহেতু এইটো তেওঁলোকৰ ভৱিষ্যতৰ কাৰণে বহু গুৰুত্বপূৰ্ণ।’

লগতে ভাৰপ্ৰাপ্ত বিষয়াগৰাকীয়ে কয়, “আমি আশা কৰিছিলো তেওঁলোকে তেওঁলোকৰ সিদ্ধান্তৰ ওপৰত পুনৰ বিবেচনা কৰিব কিন্তু তেওঁলোকে নকৰিলে আৰু আমি তেওঁলোকক আটক কৰিলো।”

উল্লেখযোগ্য যে ১৮ বছৰৰ তলৰ আটাইকেজন ছাত্ৰকে আৰক্ষীয়ে তিনিচুকীয়া জিলাৰ নিজা নিজা ঘৰৰ পৰা আটক কৰে।

আৰক্ষীয়ে নিজাববীয়াকৈ এটা গোচৰ (৭৮/১৯) ৰুজু কৰি ছাত্ৰকেইজনক আটক কৰে আৰু তিনিচুকীয়া জুভেনাইল জাষ্টিচ ব’ৰ্ডত হাজিৰ কৰায়।