শিৱসাগৰত ৰসৰাজ লক্ষ্মীনাথ বেজবৰুৱাৰ নামত ৱেবচাইট মুকলি

শিৱসাগৰত আজি এক গাম্ভিৰ্যপূৰ্ণ অনুষ্ঠানত সাহিত্যৰথী লক্ষ্মীনাথ বেজবৰুৱাৰ নামত এটা ৱেবচাইট মুকলি কৰা হয়। শিৱসাগৰ নগৰৰ দিখৌ দলংৰ সমীপৰ বেজবৰুৱা চুকত থকা লক্ষ্মীনাথ বেজবৰুৱাৰ পৈতিক ভেটিত ৱেবচাইট মুকলিৰ অনুষ্ঠান অনুষ্ঠিত হয়।

lakshminathbezbaroa.lakshminathbezbaroa.in নামৰ ৱেবচাইটো মুকলি কৰে অসম সাহিত্য সভাৰ প্ৰাক্তন সভাপতি ড০ নগেন শইকীয়াই।

লক্ষ্মীনাথ বেজবৰুৱাৰ নাতি প্ৰফুল্ল চন্দ্ৰ বেজবৰুৱাৰ ঘৰত থকা প্ৰফুল্ল চন্দ্ৰ বেজবৰুৱা অধ্যয়ণ কেন্দ্ৰত অনুষ্ঠিত এখন সভাত এই ৱেবচাইট মুকলি কৰা হয়। ৱেবচাইট মুকলি কৰাৰ পূৰ্বে প্ৰফুল্ল চন্দ্ৰ বেজবৰুৱাৰ বাসগৃহৰ চৌহদত থকা ৰসৰাজ লক্ষ্মীনাথ বেজবৰুৱাৰ সমাধিত প্ৰথমে বন্তি প্ৰজ্বলন কৰে নগেন শইকীয়া, প্ৰফুল্ল চন্দ্ৰ বেজবৰুৱাৰ সহধৰ্মীনী অৰুণদ্ধুতি বেজবৰুৱা আৰু পুত্ৰ সত্যকাম বেজবৰুৱাই।

ৱেবচাইটটোত লক্ষ্মীনাথ বেজবৰুৱাৰ জীৱনপঞ্জীৰ লগতে তেখেতৰ সৃষ্টিৰাজীৰ বিতং তথ্য পোৱা যাব। ৱেবচাইটটো তৈয়াৰ কৰিছে শিৱসাগৰৰ সঞ্জীৱ গগৈয়ে।

বিশিষ্ট সাংবাদিক মণিৰুল ইছলাম বড়াই আঁত ধৰা অনুষ্ঠানটোত দিলীপ বুঢ়াগোহাঁই, দূৰ্লভ বুঢ়াগোহাঁই, কবি প্ৰেম গগৈ,  শিৱসাগৰ মহাবিদ্যালয়ৰ প্ৰাক্তন অধ্যক্ষ প্ৰকাশ কটকী, শিৱসাগৰ ছোৱালী মহাবিদ্যালয়ৰ প্ৰাক্তন অধ্যক্ষ হেমন্ত ফুকন,  শিৱসাগৰ চৰকাৰী উচ্চতৰ মাধ্যমিক বহুমূখী বিদ্যালয়ৰ প্ৰাক্তন অধ্যক্ষ হকিকুৰ ৰহমানকে ধৰি কেইবাগৰাকী বিশিষ্ট ব্যক্তি উপস্থিত থাকে।