ৰাষ্ট্ৰীয় পেলু প্ৰতিষেধক দিৱসত চৰকাৰী দৰৱ খাই পাঠশালাত অসুস্থ অৰ্ধশতাধিক কণমানি ছাত্ৰ-ছাত্ৰী

চৰকাৰী পেলু দৰৱ খাই পাঠশালাৰ তিতকা উচ্চ মাধ্যমিক বিদ্যালয়ৰ ৫০ গৰাকীৰো অধিক কণমানি ছাত্ৰ-ছাত্ৰী চিকিৎসালয়ত ভৰ্তি হ’ব লগা হৈছে।

অসুস্থ ছাত্ৰ-ছাত্ৰীসকলক ততাতৈয়াকৈ পাঠশালাৰ চহিদ মদন ৰাউতা বজালী মহকুমা চিকিৎসালয়ত ভৰ্তি কৰা হয়।

দৰৱ খোৱাৰ পিছতে চৰকাৰী স্কুলৰ ল’ৰা-ছোৱালীহঁত অসুস্থ হৈ পৰাত অভিভাৱকসকলৰ মাজত হুৱাদুৱা লাগে আৰু ঘটনাটোৱে সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।

১০ ফেব্ৰুৱাৰিত ৰাষ্ট্ৰীয় পেলু প্ৰতিষেধক দিৱস উপলক্ষে ৰাষ্ট্ৰীয় স্বাস্থ্য আঁচনিৰ উদ্যোগত অসম চৰকাৰৰ স্বাস্থ্য বিভাগে ছাত্ৰ-ছাত্ৰীহঁতৰ বাবে বিনামূলীয়াকৈ পেলুৰ দৰৱ খুওৱা অভিযান চলাইছিল।

ঘটনাটো সন্দৰ্ভত মদন ৰাউতা চিকিৎসালয়ৰ অধীক্ষক হিতেশ তালুকদাৰে কয়, ‘দৰৱৰ প্ৰতিক্ৰিয়া হিচাপে এই ঘটনা হোৱা নাই। টেবলে’টবোৰ ভাল, কিন্তু পেলু দৰৱ খোৱা ছাত্ৰ-ছাত্ৰীসকলে ভয় খালে। টেবলে’ট খোৱা এজন ছাত্ৰ অসুস্থ হোৱাৰ পিছত তাকে দেখি বাকী ল’ৰা-ছোৱালীবোৰো ভাগি পৰে। এইটো গুৰুতৰ ঘটনা নহয়।’

চিকিৎসকজনে গুৰুতৰ ঘটনা নহয় বুলিলেও বহু অভিভাৱকে প্ৰশ্ন তুলিছে, ‘চৰকাৰে ল’ৰা-ছোৱালীৰ স্বাস্থ্য ভাল হ’ব বুলি খুওৱা টেবলে’ট খাই আমাৰ সৰু সৰু ল’ৰা-ছোৱালীবোৰৰ হঠাতে যদি গা বেয়া হয়, আমাৰ চিন্তা নহ’ব কিয়?’

চৰকাৰী বিদ্যালয়ত নিজৰ সন্তানক পঢ়ুওৱা সাধাৰণ বহু অভিভাৱকে এনে ঘটনাৰ বাবে আগলৈ নিজৰ ল’ৰা-ছোৱালীক চৰকাৰী প্ৰতিষেধক দৰৱ খুৱাব নুখুজিব পাৰে বুলি সচেতন লোকে নিজৰ উদ্বিগ্নতা প্ৰকাশ কৰিছে।

তাৰোপৰি চৰকাৰী এনেবোৰ আঁচনিত ভাগ লোৱাৰ বাবে ৰাইজক সজাগ কৰাৰ বাবেই বহু টকা খৰচ কৰা হয়।