ডিব্ৰুগড় বিশ্ব বিদ্যালয় চৌহদৰ পৰা প্ৰৱঞ্চকক আটক

সোমবাৰে ডিব্ৰুগড় বিশ্ব বিদ্যালয় প্ৰশাসনিক বিল্ডিং চৌহদৰ পৰা ডিব্ৰুগড় আৰক্ষীয়ে এটা নকলি পিষ্টল আৰু প্ৰতিৰক্ষা মন্ত্ৰালয়ৰ ৫খন পৰিচয় পত্ৰৰ সৈতে এজন যুৱকক আটক কৰে।

আৰক্ষীৰ পৰা জানিব পৰা অনুসৰি ধৃত যুৱক জনক ডিব্ৰুগড়ৰ নেপালী গাৱঁৰ মধুপুৰৰ বাসিন্দা প্ৰিন্স ছেত্ৰী(২৪) ওৰফে সাগৰ ছেত্ৰী বুলি চিনাক্ত কৰা হৈছে।

আৰক্ষীৰ মতে প্ৰিঞ্চ ছেত্ৰী নামৰ ঠগ যুৱকজনে নিজকে ভাৰতীয় চোৰাংচোৱা সংস্থা (ৰ’)ৰ লেফটেনেণ্ট তথা সেনাৰ ডাটা এণ্ট্ৰি অপাৰেটৰ বুলি পৰিচয় দিছিল।

যুৱকজনক বৰ্তমান আৰক্ষীৰ জিম্মাত ৰখা হৈছে বুলি জানিবলৈ দি ডিব্ৰুগড় আৰক্ষী থানাৰ এজন আৰক্ষী বিষয়াই কয়, ‘আমি তেওঁৰ টি এছ ০৯ ই এইছ ২৫০৫ নম্বৰৰ মটৰচাইকেলখন জব্দ কৰিছো। বৰ্তমান আমাৰ তদন্ত প্ৰাৰ্থমিক পৰ্যায়ত আছে। কাইলৈ আমি তেওঁক জেললৈ প্ৰেৰণ কৰিম।’

যুৱক জনক অস্ত্ৰ-শস্ত্ৰ আইন ২৫ অধীনত আটক কৰাৰ লগতে তেওঁৰ বিৰুদ্ধে ডিব্ৰুগড় আৰক্ষী থানাত ৪১৯ নং গোচৰ ৰুজু কৰা হৈছে বুলি জানিবলৈ দি ডিব্ৰুগড়ৰ অতিৰিক্ত আৰক্ষী অধীক্ষক সুৰজিত সিং পানেশ্বৰে নৰ্থ-ইষ্ট নাওক কয়, ‘আগতে তেওঁ সেনা বাহিনীত ডাটা এণ্ট্ৰি অপাৰেটৰ হিচাপে কাম কৰিছিল যদিও পিছলৈ তেওঁ নিজকে সেনা বিষয়া বুলি পৰিচয় দিবলৈ ধৰে।’