ত্ৰিপুৰা-বাংলাদেশ সীমান্তৰে ভাৰতত অনুপ্ৰৱেশ কৰা ৯জন বাংলাদেশীক আটক

ত্ৰিপুৰা-বাংলাদেশ সীমান্তৰ সীমনাত আজি ভাৰতত অনুপ্ৰৱেশ কৰা ৯জন বাংলাদেশী নাগৰিকক আটক কৰা হয়।

সীমনা পশ্চিম ত্ৰিপুৰাৰ জিলাৰ অন্তৰ্গত আৰু আগৰতলাৰ পৰা প্ৰায় ৫০ কিলোমিটাৰ দূৰত অৱস্থিত।

অনুপ্ৰৱেশকাৰীকেইজনৰ মাজৰ ৩জন পুৰুষ, ৪গৰাকী মহিলা আৰু দুটি শিশু।

নামকেইটা ক্ৰমে বকুল দাস (৩০), পুতুল দাস (৭৫), অনিল দাস (৭০), ৰঞ্জন দাস (৪৪), ৰনিকা দাস (৭), সুস্মিতা দাস (২০), শিৱা দাস (১) ৰিমা দাস (১৪), মিনু দাস (৪৫)।

আৰক্ষীয়ে জানিবলৈ দিয়ামতে, আটক কৰা লোককেইজনৰ হাতত কোনো বৈধ নথি-পত্ৰ নাছিল।

প্ৰথমে মতাই গাৱঁৰ গাওঁবাসীয়ে তেওঁলোকক আটক কৰে আৰু স্থানীয় আই পি এফ টিৰ বিধায়ক ব্ৰিছকেতু দেববাৰ্মাক জনায়। বিধায়কজনে আৰক্ষী আৰু বি এছ এফক অৱগত কৰে আৰু আৰক্ষী আহি আটাইকেইজনকে আটক কৰে।

বিধায়ক ব্ৰিছকেতু দেববাৰ্মাই জানিবলৈ দিয়ে যে যি অংশইদি অনুপ্ৰৱেশকাৰীকেইজন প্ৰৱেশ কৰিছিল, সেই অংশটো আচলতে ক’ভাৰ ড্ৰেইন (পানী যোৱা ঢাকনীযুক্ত নলা) তেওঁলোকে এই ক’ভাৰ ড্ৰেইনেৰে প্ৰৱেশ কৰিছিল। তাৰোপৰি তেওঁলোকে সীমান্ত পাৰ কৰি দিবৰ বাবে মধ্যস্থতাকাৰীৰ সহায় লৈছিল আৰু প্ৰতিজনৰ বাবদ ১০ হাজাৰকৈ টকা দিছিল।

বিধায়কজনে বি এছ এফে ভালদৰে পহৰা নিদিয়াৰো অভিযোগ আনে।

তেওঁ কয়, যোৱা কিছু দিন ধৰি সীমনা অংশইদি বাংলাদেশৰ নাগৰিক অবৈধভাৱে প্ৰৱেশ কৰিয়ে আছে।

আটাইকেইজন অনুপ্ৰৱেশকাৰীক বৰ্তমান সিধাই আৰক্ষী থানাত ৰখা হৈছে।

সিধাই আৰক্ষী থানাৰ ভাৰপ্ৰাপ্ত বিষয়াই আটাইকেইজনেই বাংলাদেশী বুলি কোৱাৰ বিপৰীতে আটকাধীন লোককেইজনে কয়, যে তেওঁলোকৰ ৬জনহে বাংলাদেশৰ পৰা আহিছে, বাকী তিনিজন শিলচৰ, ত্ৰিপুৰা আৰু কলকাতাৰ পৰা আহিছে।