আৰক্ষী, চি আৰ পি এফৰ দল লৈ বৰপেটাৰোডত জিলা প্ৰশাসনৰ উচ্ছেদ অভিযান

বৰপেটা জিলাৰ বৰপেটাৰোডৰ সাতভনীৰটোপত মঙলবাৰে জিলা প্ৰশাসনে উচ্ছেদ অভিযান চলায়।

মঙলবাৰে ৰাতিপুৱাৰে পৰা আৰম্ভ কৰা এই উচ্ছেদ অভিযান কালত বৰপেটা জিলা প্ৰশাসনে ছয় বিঘা মাটিত গৃহ নিৰ্মাণ কৰি বসবাস কৰি থকা মুঠ ১২ টাকৈ পৰিয়ালক উচ্ছেদ কৰে।

বৰপেটা জিলা প্ৰশাসনে বিগত সময়ৰ পৰা সেই স্থানত বসবাস কৰি থকা পৰিয়াল কেইটাক উক্ত অঞ্চল খালী কৰি দিবলৈ জাননী জাৰি কৰি আহিছিল যদিও পৰিয়াল কেইটাই প্ৰশাসনক জাননীক অবজ্ঞা কৰি অধিকাৰ কৰি থকা ভূমি মুকলি কৰি নিদিয়াই বাবে এনেদৰে উচ্ছেদ অভিযান চলাবলগীয়া হয় বুলি এগৰাকী বিষয়াই উল্লেখ কৰে।

বৰনগৰ ৰাজহ চক্ৰ বিষয়াৰ নেতৃত্বত আৰক্ষী, অৰ্ধসামৰিক বাহিনীৰ এটা বিশাল দল লৈ মঙলবাৰে ৰাতিপুৱাই জিলা প্রশাসন সাতভনীৰ টোপত উপস্থিত হয় আৰু জেচিবি লগাই উচ্ছেদ অভিযান আৰম্ভ কৰে।

আনহাতে, প্ৰশাসনৰ এই উচ্ছেদ অভিযানৰ পাছতে উচ্ছেদিত পৰিয়ালৰ লোক সকলে কান্দোনত ভাঙি পৰে আৰু এতিয়া তেওঁলোক কলৈ যাব বুলি সংবাদ মাধ্যমৰ আগত দুখ প্ৰকাশ কৰে।

প্ৰশাসনে তেওঁলোকক নিজৰ গৃহৰ সামগ্ৰী সমূহ অন্য স্থানলৈ নিয়াৰ বাবেও কোনোধৰণৰ সময় নিদিলে বুলি উচ্ছেদিত পৰিয়ালৰ লোকসমূহে অভিযোগ কৰে।