উত্তৰ প্ৰদেশত ৩,৩৫০ টন সোণ ভাণ্ডাৰৰ সম্ভেদ; শীঘ্ৰে মোদীৰ ৫ ট্ৰিলিয়ন অৰ্থনীতিৰ দেশ হ’ব নেকি ভাৰত ?

উত্তৰ প্ৰদেশৰ সোণভদ্ৰাৰ দুখন পাহাৰত সোণ, য়ুৰেনিয়ামকে ধৰি বহু মূল্যবান ধাতুৰ ভাণ্ডাৰৰ সন্ধান লাভ কৰিছে দেশৰ ভূতত্ত্ববিদ সকলে।

তথ্য অনুসৰি সোণভদ্ৰাৰ পাহাৰ দুখনত ৩ হাজাৰ টনৰো অধিক সোণৰ ভাণ্ডাৰৰ সম্ভেদ লাভ কৰা হৈছে।

সম্ভেদ লাভ কৰা এই সোণ ভাণ্ডাৰত থকা সোণৰ পৰিমাণ বৰ্তমান ভাৰত চৰকাৰৰ হাতত মজুত থকা সোণতকৈ ৫ গুণ বেছি।

ইতিমধ্যে চৰকাৰে ইয়াৰ নিলামৰ বাবে প্ৰয়োজনীয় প্ৰক্ৰিয়া আৰম্ভ কৰা বুলি খবৰ লাভ কৰা হৈছে।

বৰ্তমানলৈ ভাৰতৰ হাতত মজুত থকা সোণৰ ভাণ্ডাৰৰ পৰিসংখ্যা অনুসৰি ভাৰত বিশ্বৰ সোণ থকা দেশৰ তালিকাত নিম্ন স্থানত আছে যদিও সোণভদ্ৰাত উদ্ধাৰ হোৱা সোণৰ দ্বাৰা ভাৰতে সোণ উৎপাদন কৰা দেশৰ দ্বিতীয় স্থানলৈ উন্নীত হ’ব।

সোণ মজুত থকা দেশবোৰৰ ভিতৰত প্ৰথম স্থানত আছে আমেৰিকা যুক্তৰাষ্ট্ৰ। আমেৰিকাৰ হাতত ৮,১৩৩.৫ টন সোণ মজুত থকাৰ বিপৰীতে দ্বিতীয় স্থানত থকা জাৰ্মানীৰ হাতত মুঠ ৩,৩৬৬ টন সোণ মজুত আছে।

ইয়াৰ পাছতে ক্ৰমে ইটালী, ফ্ৰাঞ্চ, ৰাছিয়া আদি দেশে অধিক সোণ মুজত থকা দেশৰ স্থান অধিকাৰ কৰি আছে।

উত্তৰ প্ৰদেশ চৰকাৰে অতি শীঘ্ৰে পাহাৰ দুখন নিলামৰ বাবে প্ৰয়োজনীয় সকলো ব্যৱস্থা সম্পুৰ্ণ কৰিব।

সোণভদ্ৰাৰ সোণৰ ভাণ্ডাৰে ভাৰতৰ অৰ্থ ব্যৱস্থাক শক্তিশালী কৰাৰ লগতে প্ৰধান মন্ত্ৰী মোদীৰ ৫ ট্ৰিলিয়ন ডলাৰ অৰ্থনীতিৰ সপোনক বাস্তৱত ৰূপায়িত কৰিব নেকি?