‘হত্যা’ৰ ছয় মাহ পাছতো বাচি আছিল শ্বীনা বৰা; কিয় ক’লে ইন্দ্ৰাণীয়ে?

অভিযোগ অনুসৰি ২০১২ চনৰ ২৪ এপ্ৰিলত শ্বীনা বৰাক হত্যা কৰা হৈছিল।কিন্তু ইয়াৰ ছয় মাহ পাছতো শ্বীনা বাচি আছিল বুলি দাবী কৰিছে এই হত্যাত অভিযুক্ত ইন্দ্ৰাণী মুখাৰ্জীয়ে।

জামিন বিচাৰি পঞ্চমবাৰৰ বাবে জনোৱা আবেদনৰ শুনানি গ্ৰহণৰ সময়ত আদালতত এই দাবী কৰে ইন্দ্ৰাণীয়ে।

২০১২ চনৰ ২৪ এপ্ৰিলৰ ছয় মাহ পাছতো শ্বীনা বৰাই তাইৰ প্ৰেমিক বন্ধু ৰাহুল মুখাৰ্জীৰ সৈতে আছিল বুলি ইন্দ্ৰাণীয়ে দাবী কৰে।

ৰাহুলৰ কল ৰেকৰ্ড দাঙি ধৰি ইন্দ্ৰাণীয়ে দাবী কৰে যে শ্বীনা আৰু ৰাহুলৰ মাজত ২০১২ চনৰ ছেপ্টেম্বৰ মাহতো মেছেজৰ আদান প্ৰদান চলিছিল।

আদালতত ইন্দ্ৰাণীয়ে জনায়,’’শ্বীনাৰ হত্যাৰ অভিযোগ মোৰ ওপৰত পৰিছে। কিন্তু প্ৰমানে কৈছে যে ২০১২ চনৰ ২৬,২৭ আৰু ২৮ ছেপ্টেম্বৰত তাই বাচি আছিল আৰু ৰাহুলৰ সৈতে আছিল।

ইন্দ্ৰাণীয়ে ২০১২ চনৰ ২৭ ছেপ্টেম্বৰৰ মেছেজ পঢ়িও শুনায়।এটাত ৰাহুলে লিখিছে,’’ মই কাৰ পাৰ্কত আছো, গুচি আহা।‘’

ইন্দ্ৰাণীৰ দাবী মতে, সেই মেছেজৰ প্ৰত্যুত্তৰত শ্বীনাই লিখিছে,’’ ৫ মিনিট ৰ’বা।‘’ ইয়াৰ পাছত ৰাহুলে হেনো লিখিছে,’’ব’লা খৰধৰ কৰা।‘’

ইন্দ্ৰাণীৰ দাবী অনুসৰি, শ্বীনা বৰাক যিদিনা হত্যা কৰাৰ অভিযোগ কৰা হৈছে, তাৰ ছয় মাহ পাছত এই ঘটনা ঘটিছে।

ইয়াৰ পৰা বুজা যায় যে উদ্ধাৰ হোৱা দেহ (চিবিআইয়ে দাবী কৰা শ্বীনাৰ দেহৰ অংশ দুটি)ৰ সৈতে শ্বীনাৰ কোন সম্পৰ্ক নাই!

ইন্দ্ৰাণীয়ে লগতে দাবী কৰে যে সেই সময়ত তেওঁ ইংলেণ্ডত আছিল, গতিকে সেইবোৰ তেওঁ ৰাহুললৈ পঠিওৱা বুলি কোনেও দাবী কৰিব নোৱাৰে।

আদালতত এতিয়া গোটেই বিষয়টোৱে আকৌ এবাৰ মায়াজালৰ সৃষ্টি কৰাৰ সম্ভাৱনাই দেখা দিছে।