আজিৰে পৰা মুকলি হ’ল ৰহাৰ টোলগেট; এবাৰ পাৰ হ’লেই দিব লাগিব ৩১৫টকা

বিভিন্ন স্থানীয় সংগঠনৰ প্ৰতিবাদ সত্ত্বেও আজিৰে পৰা মুকলি কৰা হৈছে ৰহাৰ টোলগেট। সেইদৰে আজিৰে পৰাই এই পথেৰে পাৰ হৈ যোৱা বাহনৰ পৰা মাছুল আদায় কৰা হ’ব।

নগাও জিলা প্ৰশাসনৰ সৈতে ৰাষ্ট্ৰীয় ঘাইপথ প্ৰাধিকৰণৰ আলোচনাৰ পাছতে প্ৰাধিকৰণে দেওবাৰৰ পৰা বাহনসমূহৰ পৰা মাছুল আদায় কৰিবৰ বাবে এখন জাননী জাৰি কৰিছে।

এবাৰত চাৰিচকীয়া বাহনে ৯৫টকা আদায় দিব লাগিব আৰু অহা যোৱাৰ বাবে ১৪০ টকা ধাৰ্য কৰা হৈছে।

বাণিজ্যিক বাহনসমূহে এবাৰত পাৰ হ’লে ১৫০ টকা আৰু অহা যোৱাৰ বাবে ২২৫ টকা আদায় দিব লাগিব।

বাছ আৰু ট্ৰাকসমূহে এবাৰ পাৰ হ’লে  ৩১৫টকা আৰু অহা যোৱাৰ বাবে ৪৭০টকা আদায় দিব লাগিব।

উল্লেখযোগ্য যে ৰাষ্ট্ৰীয় ঘাইপথ প্ৰাধিকৰণ, ঘাইপথ ব্যৱস্থাপনা আৰু নিয়ন্ত্ৰক বোৰ্ডে ৰাজ্যখনত পৰ্যায়ক্ৰমে টোল গেটসমূহ মুকলি কৰাৰ সিদ্ধান্ত গ্ৰহণ কৰিছে।

বিগত ২০১৫ আৰু ২০১৮চনত ৩৭নং আৰু ৩১নং ৰাষ্ট্ৰীয় ঘাইপথত টোলগেটসমূহ মুকলি কৰিছিল। কিন্তু কৃষক মুক্তি সংগ্ৰাম সমিতি আৰু অসম জাতীয়তাবাদী যুৱ ছাত্ৰ পৰিষদৰ দৰে সংগঠনসমূহৰ প্ৰতিবাদত বন্ধ কৰি দিয়া হৈছিল।

ইপিনে., যোৱা ৩০ জানুৱাৰিত বিজনীত মন্ত্ৰী চন্দন ব্ৰহ্মই টোলগেটখন মুকলি কৰিছিল।

জানিব পৰা মতে, সদ্যহতে ৰহাৰ টোলগেটত স্থানীয় লোকসকলৰ যান-বাহনৰ পৰা কোনো কৰ সংগ্ৰহ কৰা নহয়।