লোক সাহিত্য-লোক সংস্কৃতিয়ে এটা জাতিক একত্ৰিত কৰে : ড: গোবিন্দ প্ৰসাদ শৰ্মা

“অসমীয়া জাতিৰ হেৰাই যোৱা একত্ৰীকৰণৰ শক্তি লোক সাহিত্য অথবা লোক সংস্কৃতিৰ জৰিয়তেহে উদ্ধাৰ কৰিব পৰা যাব৷” এই মন্তব্য প্ৰথিতযশা সাহিত্যিক, চিন্তাবিদ ড: গোবিন্দ প্ৰসাদ শৰ্মাৰ ৷

বৰপেটাৰ বিশিষ্ট লেখিকা, শিশু সাহিত্যিক হিৰণ শইকীয়া লহকৰ ৰচিত “লোক সংস্কৃতিত এভুমুকি” শীৰ্ষক গ্ৰন্থখন উন্মোচন কৰি দেওবাৰে প্ৰথিতযশা সাহিত্যিক গৰাকীয়ে কয় যে, লোক সাহিত্য আৰু লোক সংস্কৃতিয়েহে এটা জাতিক একত্ৰিত কৰে ৷

বিনয়া বালা ডাকুৱাৰ সভাপতিত্বত বৰপেটা অম্বিকাগিৰী বাণীকান্ত কাকতি সাহিত্য সভা ভৱনত বিয়লি অনুষ্ঠিত গ্ৰন্থ উন্মোচনী অনুষ্ঠানখনত ড: গোবিন্দ প্ৰসাদ শৰ্মাই লগতে কয় যে, কেৱল লোক সাহিত্য-সংস্কৃতিৰ আধাৰতে জাৰ্মানত বাস কৰা তিনিশ ক্ষুদ্ৰ ক্ষুদ্ৰ জাতি একত্ৰিত হৈ শক্তিশালী এক জাৰ্মান জাতি হিচাপে বিশ্বৰ দৰবাৰত প্ৰতিষ্ঠিত হৈছে ৷

তেওঁ লগতে বহু ক্ষুদ্ৰ ক্ষুদ্ৰ ফৰাচী ৰাজ্য লগ হৈ এখন ফৰাচী দেশ হিচাপে গঠন হোৱাৰ মুলতে হৈছে লোক সাহিত্য অথবা লোক সংস্কৃতি বুলিও মন্তব্য কৰে। গাঁৱলীয়া জীৱন আৰু গাঁৱলীয়া মানুহৰ মাত কথাই লোক সাহিত্য বুলি মন্তব্য কৰি তেওঁ কয় যে গাঁৱবোৰ লাহে লাহে নোহোৱা হৈ গৈছে ৷ এনে অৱস্থাত লোক সাহিত্যৰ ভৱিষ্যত কি বুলিও তেওঁ প্ৰশ্ন উত্থাপন কৰে ৷

এই অনুষ্ঠানত মুখ্য অতিথি হিচাপে অংশ গ্ৰহণ কৰি বিশিষ্ট সাহিত্যিক অক্ষয় কুমাৰ মিশ্ৰই নৱ প্ৰজন্মক পঢ়াৰ প্ৰতি আগ্ৰহী হ’বলৈ আহ্বান জনায় ৷ মাধন ভুঞা শৰ্মাই আঁত ধৰা অনুষ্ঠানটোত বিশিষ্ট লেখিকা নিৰুপমা মিশ্ৰ, লেখিকা অঞ্জলী শৰ্মাইও ভাষণ প্ৰদান কৰে ৷