শৈক্ষিক সহযোগিতাৰ বাবে গিৰিজানন্দ চৌধুৰী বিশ্ববিদ্যালয়লৈ ভূটান চৰকাৰৰ প্ৰতিনিধি দলৰ ভ্ৰমণ
ভূটানৰ ৰয়েল চৰকাৰৰ উচ্চপদস্থ বিষয়াৰ লগতে ৰয়েল ভূটানৰ কনছুলেট জেনেৰেলৰ সৈতে গঠিত এটা প্ৰতিনিধি দলে ১৩ মে’ত আজাৰাস্থিত গিৰিজানন্দ চৌধুৰী বিশ্ববিদ্যালয় ভ্ৰমণ কৰে।
এই ভ্ৰমণৰ উদেশ্য হৈছে ভূটানৰ ৰয়েল চৰকাৰ আৰু গিৰিজানন্দ চৌধুৰী বিশ্ববিদ্যালয়ৰ সৈতে শৈক্ষিক সহযোগিতা স্থাপন কৰা।
ভ্ৰমণকাৰী বিষয়াসকলৰ ভিতৰত আছিল ৰাষ্ট্ৰদূত ট্ছৱাং চোফেল ডৰ্জী, ভূটানৰ শিক্ষা আৰু দক্ষতা বিকাশ মন্ত্ৰালয়ৰ সচিব শ্ৰীযুত সোণম ৱাংডি, শিক্ষা বিভাগৰ উপ-মুখ্য কাৰ্যসূচী বিষয়া কনছুল জেনেৰেল এইচ.ই. জিগমে থিনল্যে নামগ্যাল , আৰু কনছুল ফুৰ্পা শ্বেৰিং।
তেওঁলোকৰ সৈতে একেলগে ভূটানৰ পৰা অহা বাৰজন শিক্ষক আৰু উগ্যেঞ্চে প্ৰাথমিক বিদ্যালয়ৰ অধ্যক্ষ শ্ৰীযুত সুৰেন প্ৰধান উপস্থিত থাকে। বিশ্ববিদ্যালয় চৌহদ ভ্ৰমণৰ সময়ত প্ৰতিনিধি দলটোৱে বিভাগ আৰু গৱেষণাৰ সুবিধাসমূহ পৰিদৰ্শন কৰে।
প্ৰতিনিধি দলটোৱে গিৰিজানন্দ চৌধুৰী বিশ্ববিদ্যালয়ৰ আচাৰ্য্য অধ্যাপক ড০ জয়ন্ত ডেকা, উপাচাৰ্য অধ্যাপক ড০ কন্দৰ্প দাস আৰু পঞ্জীয়ক অধ্যাপক ড০ দীপাংকৰ সাহা , বিশ্ববিদ্যালয়ৰ বিভিন্ন স্কুলৰ ডীনৰ উপৰিও শ্ৰীমন্ত শংকৰ একাডেমী চচাইটিৰ প্ৰতিনিধি মাননীয়া সুজাতা চৌধুৰী আৰু কুংকী চৌধুৰীৰ সৈতে বৈঠকত মিলিত হয়।
বৈঠকত শৈক্ষিক মিত্ৰতা আৰু বিনিময় কাৰ্যসূচীৰ বাবে ভূটান চৰকাৰ আৰু গিৰিজানন্দ চৌধুৰী বিশ্ববিদ্যালয়ৰ মাজত সক্ৰিয় সহযোগিতাৰ সম্ভাৱনাৰ বিষয়ে আলোচনা কৰা হয়। এই ক্ষেত্ৰত গিৰিজানন্দ চৌধুৰী বিশ্ববিদ্যালয় ভূটানৰ ৰয়েল চৰকাৰৰ সৈতে বন্ধুত্ব আৰু সহযোগিতাৰ এক সবল সম্পৰ্ক গঢ়ি তোলাৰ ক্ষেত্ৰত দৃঢ় প্ৰতিজ্ঞাবদ্ধ।