গৌৰীসাগৰত সংঘটিত পথ দুৰ্ঘটনাত থিতাতে নিহত দম্পতী

শিৱসাগৰ জিলাৰ গৌৰীসাগৰত আজি পুৱতি নিশা এক ভয়ংকৰ পথ দুৰ্ঘটনা সংঘটিত হয়। দুৰ্ঘটনাটোত শিৱসাগৰ জিলাৰ শিমলুগুৰি থানাৰ অন্তৰ্গত গড়মূৰৰ প্ৰয়াত যোগেশ্বৰ চেতিয়াৰ পুত্ৰ প্ৰাঞ্জল দীপ চেতিয়া আৰু বোৱাৰী হিমাদ্ৰী বৰুৱা থিতাতে নিহত হয়।

ঘটনাৰ বিৱৰণী অনুসৰি কালি নিশা দুই স্বামী-স্ত্ৰীয়ে হৰ্ণবিল ফেষ্টিভেলৰ পৰা এ এছ ০৪-৬৫৫৮ নম্বৰৰ মাৰুতি চেলেৰিঅ’ গাড়ীৰে ঘৰলৈ আহি আছিল।

তেনেতে নিশা প্ৰায় ১.৩০ বজাত পথত শিৱসাগৰৰ চাৰিং কেঁকুৰিত পথৰ দাঁতিত ৰৈ থকা য়ু পি ২১ জি এন ২০৮১ নম্বৰৰ ট্ৰাকখনত খুন্দা মাৰে। ফলত দুই স্বামী-স্ত্ৰীয়ে ঘটনাস্থলীতে কৰুণ মৃত্যুক সাবটি ল’ব লগীয়া হয়।

পিছত ঘটনাস্থলীত গৌৰীসাগৰ থানাৰ আৰক্ষী উপস্থিত হৈ দুয়োৰে মৃতদেহ মৰণোত্তৰ পৰীক্ষাৰ বাবে শিৱসাগৰ অসামৰিক চিকিৎসালয়লৈ প্ৰেৰণ কৰে।

আনহাতে এনেদেৰ দুৰ্ঘটনাত পতিত হৈ দুই স্বামী-স্ত্ৰীয়ে কৰুণ মৃত্যুক সাবটি লোৱাত অঞ্চলটোত এক শোকাকুল পৰিৱেশে বিৰাজ কৰিছে।