নীল গাইলৈ লক্ষ্য কৰি এৰা গুলীত আহত গৰ্ভৱতী মহিলা
উত্তৰ প্ৰদেশত সংঘটিত হৈছে এই হৃদয় বিদাৰক ঘটনা। যোৱা দেওবাৰে উত্তৰ প্ৰদেশৰ মহোবাত নামৰ ঠাইত এজন ব্যক্তিয়ে চিকাৰৰ উদ্দেশ্যে এটি নীলগাইলৈ লক্ষ্য কৰি নিক্ষেপ কৰা গুলীত আঘাতপ্ৰাপ্ত হৈ এতিয়া জীৱন মৃত্যুৰে যুঁজি আছে এগৰাকী গৰ্ভৱতী মহিলা। গুৰুতৰ অৱস্থাত মহিলাগৰাকীক হাস্পাতালত ভৰ্তি কৰোঁৱা হৈছে। চিকিৎসকৰ মতে মহিলাগৰাকীৰ লগতে তেওঁৰ গৰ্ভস্থ সন্তানৰ অৱস্থা সংকটজন বুলি জানিবলৈ দিছে হাস্পাতালখনৰ চিকিৎসকে।
আৰক্ষীৰ তথ্য অনুসৰি আহত মহিলাগৰাকীৰ বয়স ৩০ বছৰ। মহিলাগৰাকীৰ দাম্পত্যসংগীৰ নাম ভূপেন্দ্ৰ সিঙ ৰাজপুত। যোৱা দেওবাৰে গৰ্ভৱতী বন্দনাই তেখেতৰ দাম্পত্যসংগী ভূপেন্দ্ৰ সিঙ ৰাজপুতৰ সৈতে পথাৰত কাম কৰি আছিল।
তেওঁলোকৰ পৰা কেইফুটমান দূৰৈত হাতত বন্দুক লৈ দুজন মানুহে নীলগাই চিকাৰ কৰি আছিল। তাৰে এজনে নীলগাইৰ ওপৰত গুলীচালনা কৰে। কিন্তু তাৰে এটা গুলীয়ে লক্ষ্য হেৰুৱাই বন্দনাক আঘাত কৰে। এই ঘটনা সংঘটিত কৰি অভিযুক্ত চিকাৰি দুজনে সেই স্থানৰ পৰা পলায়ন কৰে।
গুলীবিদ্ধ বন্দনাক পথাৰত পৰি থকা দেখি নিলগতে থকা সংগী ভূপেন্দ্ৰ দৌৰি আহে। ভূপেন্দ্ৰই স্থানীয় ৰাইজৰ সহায়ত তেওঁক ওচৰৰ চিকিৎসালয়লৈ লৈ যায়। পিছত বন্দনাক ঝাঁচী জিলা চিকিৎসালয়লৈ স্থানান্তৰ কৰা হয় কাৰণ তেওঁৰ অৱস্থাৰ অৱনতি ঘটে।
চিকিৎসকে কয় যে বন্দনা আৰু তেওঁৰ গৰ্ভস্থ সন্তানৰ অৱস্থা সংকটজনক। ইতিমধ্যে পেটত গুলী লগাৰ বাবে বন্দনাৰ শৰীৰৰ পৰা যথেষ্ট ৰক্তক্ষৰণ হৈছে।
এই ঘটনাৰ অভিযুক্তক ধৰিবলৈ আৰক্ষীয়ে অভিযান আৰম্ভ কৰিছে। এজন আৰক্ষী বিষয়াই জনোৱা মতে, নীলগাইক চিকাৰ কৰিবলৈ কোন আহিছিল সেই সন্দৰ্ভত তদন্ত চলি আছে। ইতিমধ্যে অভিযুক্তক বিচাৰি আৰক্ষীৰ দল গঠন কৰা হৈছে।
উল্লেখ্য যে উত্তৰ প্ৰদেশত নীলগাই চিকাৰ কৰাটো আৰু চিকাৰৰ বাবে বন্দুক ৰখাটো অবৈধ তথা বেআইনী। কিন্তু কিহৰ সুৰুঙা লৈ যোগীৰ ৰামৰাজ্যত আজিও একাংশই নীলগাই চিকাৰত লিপ্ত হৈ থাকিব পাৰিছে সেয়া এই মুহূৰ্তত ডাঙৰ প্ৰশ্ন।