কলিয়াবৰত বনবিভাগৰ ব্যৰ্থতা : নলাত পৰি বনৰীয়া হাতীৰ মৃত্যু

কলিয়াবৰৰ ৰেকাপাহাৰৰ সমীপত আজি উদ্ধাৰ হয় এটি বনৰীয়া হাতীৰ মৃতদেহ। আজি পুৱা মৃতদেহটো উদ্ধাৰ হয় উত্তৰাঞ্চল শালনা বনাঞ্চলৰ অন্তৰ্গত দিজু সংৰক্ষিত বনাঞ্চলত।

কেলিডেন-সৰিয়হবাৰী সংযোগী গড়কাপ্তানী পথৰ দাঁতিৰ এটি নলাত পুৱা ৬ মান বজাত স্থানীয় ৰাইজে হাতীটোৰ মৃতদেহ প্ৰত্যক্ষ কৰে। স্থানীয় ৰাইজৰ মতে চাহবাগিচাত দিয়া ৰাসায়নিক দ্ৰব্য খোৱাৰ ফলতে বনৰীয়া হাতীটোৰ মৃত্যু হয়।

আনহাতে খাদ্যৰ সন্ধানত কাৰ্বি পাহাৰৰ পৰা নামি অহা হাতীটো বেমাৰ হৈ দুৰ্বল হৈ পৰিছিল। যাৰ কাৰণে হাতীটো নলাত পৰি উঠিব নোৱাৰাৰ ফলতেই মৃত্যুমুখত পৰে বুলি ঘটনাস্থলত উপস্থিত হোৱা বনবিভাগৰ দলে মন্তব্য কৰে।

আনহাতে কিছু সময় পাছত ঘটনাস্থলত উপস্থিত হোৱা পশু চিকিৎসকৰ দলে মৰণোত্তৰ পৰীক্ষা কৰাত হাতীটোৰ ৰক্তহীনতাৰ ফলতে মৃত্যু হোবা বুলি জনায়।

তেজৰ অভাৱৰ ফলত দুৰ্বল হৈ পৰা মাইকী হাতীজনীয়ে খাদ্য খাব নোৱাৰি মৃত্যু মুখত পৰে বুলি স্পষ্ট কৰে পশু চিকিৎসকে। ইফালে মৃত্যু হোৱা হাতীজনীৰ বয়স মাত্ৰ ২০ বছৰ বুলি চিকিৎসকে অনুমান কৰিছে।