‘বাৰেপতি মনেসজা ভাগিনৰ নামলৈ নিজৰ ব্যৰ্থতা কিয় ঢাকিবলৈ চেষ্টা কৰে মুখ্যমন্ত্ৰীয়ে?’

একাদশ শ্ৰেণীৰ বাতিল হোৱা পৰীক্ষা অনুস্থিত কৰাক লৈ মুখ্যমন্ত্ৰীয়ে কালি ফেচবুক লাইভত প্ৰকাশ কৰা বক্তব্যৰ তীব্ৰ প্ৰতিক্ৰিয়া প্ৰকাশ কৰিছে আম আদমি পাৰ্টীয়ে৷

আজি প্ৰকাশ কৰা এক প্ৰেছ বিবৃতিত দলটোৰ অসম ৰাজ্যিক সমিতিৰ সাংগঠনিক সাধাৰণ সম্পাদক ৰাজীব শইকীয়াই তীব্ৰ ক্ষোভ প্ৰকাশ কৰি কয়, পৰীক্ষা আৰু পৰীক্ষাৰ্থীক লৈ মুখ্যমন্ত্ৰীয়ে অসমত অশুভ পৰম্পৰা সৃষ্টি কৰিব বিচাৰিছে ৷

তেওঁ কয় যে, পৰীক্ষা এক পৱিত্ৰ ব্যৱস্থা, এই ব্যৱস্থা শৈক্ষিক ক্ষেত্ৰখনত এৰাই চলিব পৰা নাযায় ৷ ছাত্ৰ ছাত্ৰী এক সুন্দৰ মন আৰু পৱিত্ৰ অন্তৰ আত্মা লৈ পৰীক্ষালৈ সাঁজু হয়, পৰীক্ষাত ভাল ফলাফল লাভৰ সপোন ৰচে ৷ গতিকে মুখ্যমন্ত্ৰীয়ে একাদশ শ্ৰেণীৰ পৰীক্ষাক লৈ ফেচবুক লাইভত প্ৰকাশ কৰা বক্তব্য প্ৰত্যাহাৰ কৰিব লাগে ৷

একাদশ শ্ৰেণীৰ বাতিল হোৱা পৰীক্ষাকেইটা নিৰ্দিষ্ট সময়ৰ ভিতৰত অনুস্থিত কৰিব লাগে ৷ মুখ্যমন্ত্ৰীয়ে কৈছে যে, তেওঁ পৰহি গহপুৰলৈ যাওঁতে এগৰাকী ছাত্ৰীক লগ পাইছিল ৷ মুখ্যমন্ত্ৰীক মামা সম্বোধন কৰি ছাত্ৰী গৰাকীয়ে বোলে কৈছিল যে একাদশ শ্ৰেণীৰ বাতিল হোৱা পৰীক্ষাকেইটা পাতিব নালাগে ৷

মুখ্যমন্ত্ৰীৰ এই বক্তব্য হাস্যকৰ বুলি মত প্ৰকাশ কৰি আপৰ ৰাজ্যিক সাধাৰণ সম্পাদক ( সংগঠন )জনে মুখ্যমন্ত্ৰীক প্ৰশ্ন কৰি কয়, “মুখ্যমন্ত্ৰী মহোদয়, বাৰেপতি মনেসজা ভাগিনৰ নামলৈ নিজৰ ব্যৰ্থতা কিয় ঢাকিবলৈ চেষ্টা কৰে ?”

পৰীক্ষা কেতিয়া হ’ব আৰু ফলাফল কেতিয়া ওলাব সেই দিনবাৰ ঘোষণা মুখ্যন্ত্ৰীয়ে কৰাটো কিমান সমীচিন বুলি প্ৰশ্ন উত্থাপন কৰি আম আদমি পাৰ্টী অসমৰ নেতাজনে মুখ্যমন্ত্ৰীক কটাক্ষ কৰি কয়, “আপুনি অসমৰ মুখ্যমন্ত্ৰী, গতিকে আপোনাৰ মনলৈ আহিল বুলিয়েই সকলো কথা ৰাজহুৱা কৰাটো উচিত জানো ? আপুনিয়েই যে সকলো কথা ঘোষণা কৰে, এইবোৰ কৰিবলৈ চৰকাৰৰ বিভাগসমুহৰ উৰ্দ্ধতম কৰ্তৃপক্ষ নাই নেকি?”