মাস্ক অবিহনে ৰাজহুৱা স্থানত প্ৰধানমন্ত্ৰী মোদী; ছচিয়েল মিডিয়াত প্ৰশ্ন তুলিলে ‘আম আদমি’য়ে
কৰ’না পৰিস্থিতিৰ মাজত কেইবাবাৰো টেলিভিশ্বনত প্ৰধানমন্ত্ৰী মোদীক জনসাধাৰণৰ উদ্দেশ্যি ভাষণ দিয়া দেখা গৈছে। মোদীয়ে প্ৰতিবাৰেই দেশৰ পৰা কৰ’নাই বিদায় লোৱা নাই বুলি সোঁৱৰাই দিছিল।
প্ৰতিবাৰেই প্ৰধানমন্ত্ৰীয়ে সংক্ৰমণ ৰোধ কৰিবলৈ কোভিড বিধি মানি চলাৰ আহ্বান জনাইছিল। লগতে মাস্ক পিন্ধাৰ প্ৰয়োজনীয়তাৰ কথাও দোহাৰি সকলোকে আহ্বানো জনাইছিল।
কিন্তু সেইগৰাকী প্ৰধানমন্ত্ৰীয়েই এইবাৰ মাস্ক পৰিধান কৰিবলৈ অনিহা দেখুৱালে। আচৰিত লাগিলেও এই কথাই পোহৰলৈ আহিল।
অৰবিন্দ কেজৰিৱাল নেতৃত্বাধীন আম আদমি পাৰ্টিয়ে ছচিয়েল মিডিয়াত শ্বেয়াৰ কৰা এটা ভিডিঅ’ত তাকেই দেখা গ’ল। ইয়াকে লৈ ‘আপ’ৰ কৰ্মীসকলে ছচিয়েল মিডিয়াত প্ৰধানমন্ত্ৰী মোদীক কটাক্ষ কৰিবলৈ নাপাহৰিলে।
আপ’ৰ টুইটাৰত শ্বেয়াৰ কৰা এটা ভিডিঅ’ত দেখা গৈছে যে এক মেলাত মাস্ক অবিহনেই প্ৰধানমন্ত্ৰী নৰেন্দ্ৰ মোদী উপস্থিত হৈছে। সেই মেলাৰ হস্তশিল্পৰ ষ্টলত মোদীক মাস্ক পৰিধান কৰিবলৈ অনুৰোধ কৰা হ’ল যদিও তেওঁ সেয়া প্ৰত্যাখ্যান কৰিলে। এই পৰিস্থিতিৰেই সুযোগ গ্ৰহণ কৰিলে আপে। ছচিয়েল মিডিয়াত সেই ভিডিঅ’ এৰি দি আম আদমিয়ে লিখিছে,’’মাস্ক পৰিধান কৰক, মোদীজীৰ নিচিনা নহ’ব।‘’
Wear a mask. Don't be like Modi ji. pic.twitter.com/lPxdTEdZiI
— AAP (@AamAadmiParty) December 17, 2020
ৰাজহুৱা স্থানত এইদৰে মোদীৰ উপস্থিতিক লৈ নেটিজনসকলৰ মাজত চৰ্চা চলিছে। বহুতেই প্ৰধানমন্ত্ৰীক জনসমাৱেশত মাস্ক পৰিধান নকৰাৰ বাবে সমালোচনাও কৰিছে।
অৱশ্যে, প্ৰধানমন্ত্ৰীক এনেদৰে ব্যক্তিগতভাৱে টাৰ্গেট কৰাৰ বাবে নেটিজনৰ মাজৰ একাংশই আপৰো সমালোচনা কৰিছে।