অগপৰ সভাপতি অতুল বৰা আৰু কেশৱ মহন্তক ক’লা পতাকা প্ৰদৰ্শন

নাগৰিকত্ব সংশোধনী আইনৰ বিৰুদ্ধে পুনৰ প্ৰতিবাদ আৰম্ভ হোৱাৰ সময়তেই আজি গোলাঘাট জিলাৰ সৰুপথাৰত অসম চৰকাৰৰ কৃষি মন্ত্ৰী তথা অসম গণ পৰিষদ দলৰ সভাপতি অতুল বৰা আৰু জলসম্পদ মন্ত্ৰী কেশৱ মহন্তক ক’লা পতাকা প্ৰদৰ্শন কৰা হয়।

আজি সৰুপথাৰত অসম গণ পৰিষদে আয়োজন কৰা ‘জাতীয় ঐক্য সমাৰোহ’ত অংশ ল’বলৈ যোৱা অৱস্থাত দলটোৰ দুয়োগৰাকী প্ৰধান নেতাক অসম ছাত্ৰ সন্থাৰ সদস্যসকলে ক’লা পতাকা প্ৰদৰ্শন কৰে।

ছাত্ৰ সংগঠনটোৰ প্ৰতিবাদকাৰী সদস্যসকলে অসম গণ পৰিষদ মুৰ্দাবাদ, অতুল বৰা গ’ বেক, কেশৱ মহন্ত গ’ বেক আদি ধ্বনিৰে অঞ্চলটোৰ পৰিৱেশ উত্তপ্ত কৰি তোলে।

ছাত্ৰ সংগঠনটোৱে আজি বৰপথাৰ উচ্চতৰ মাধ্যমিক বিদ্যালয়ৰ সমীপত নাগৰিকত্ব সংশোধনী আইনৰ বিৰুদ্ধে প্ৰতিবাদ সাব্যস্ত কৰি আছিল।

উল্লেখ্য যে, অসম তথা উত্তৰ-পূবত তীব্ৰ প্ৰতিবাদ সাব্যস্ত হোৱাৰ পিছতো যোৱা ২০১৯ চনৰ ১১ ডিচেম্বৰত বিতৰ্কিত নাগৰিকত্ব সংশোধনী বিধেয়কখন সদনত গৃহীত কৰিছিল।

এই জাতিধ্বংসী আইনখন গৃহীত হোৱাৰ এবছৰ হোৱাৰ পিছত অসমত পুনৰ বিভিন্ন দল-সংগঠনে আইনখন বাতিলৰ দাবীত প্ৰতিবাদী কাৰ্যসূচী আৰম্ভ কৰিছে।