প্ৰশাসনৰ সকীয়নি নৰজিল: হাৰিয়ানাত হিন্দুত্ববাদী সংগঠনৰ সভাত উচতনিমূলক ভাষণ
সাম্প্ৰদায়িক হিংসাত পুনৰ জ্বলি উঠিব নেকি হাৰিয়ানা! নুহৰ ভয়াৱহতা মাৰ নাযাওঁতেই ৰাজ্যখনত শেহতীয়াকৈ একাংশ ধৰ্মীয় সংগঠনৰ কাৰ্যকলাপে এই আশংকা অধিক ঘনীভূত কৰি তুলিছে। আজি নুহৰ ঘটনাৰ প্ৰতিবাদস্বৰূপে সৰ্ব হিন্দু সমাজ নামৰ এক গোটৰ উদ্যোগত আয়োজিত হৈছিল এক বৃহৎ সমাৱেশ।
পালৱাল জিলাত অনুষ্ঠিত এই সমাৱেশৰ বাবে অনুমতিৰ সময়ত সমাৱেশত যাতে কোনো ঘৃণামূলক ভাষণ দিয়া নহয় তাৰ চৰ্ত আৰোপ কৰা হৈছিল তথা বৃহৎ হাৰত আৰক্ষী বাহিনী মোতায়েন কৰা হৈছিল যদিও চৰ্ত ভংগ কৰি, আৰক্ষীক অংগুষ্ঠ প্ৰদৰ্শন কৰি একাংশ বক্তাই ঘৃণামূলক বক্তব্যৰে মুকলি ভাবুকি প্ৰদান কৰে।
সমাৱেশত ভাষণ দিয়া এগৰাকী বক্তাই কোনো সম্প্ৰদায়ৰ কথা স্পষ্টকৈ উল্লেখ নকৰে যদি ‘আপুনি আঙুলি এটা তুলিলে আমি আপোনাৰ হাত কাটি দিম’ বুলি উচতনিমূলক মন্তব্য কৰে। আনহাতে আন এগৰাকী বক্তাই নিজ ভাষণৰ মাজতে ৰাইফলৰ অনুজ্ঞাপত্ৰ দাবী কৰে।
নুহৰ সংঘৰ্ষৰ মূল কাৰণ গৰুৰ চোৰাং বেহা বুলি দাবী কৰি এই বেহা বন্ধ কৰিবলৈ দাবী কৰাৰ লগতে নিৰাপত্তা নিশ্চিত কৰিবলৈ নুহত অৰ্ধসামৰিক বাহিনীৰ মুখ্য কাৰ্যালয় স্থাপন কৰাৰ দাবী জনায়। আনহাতে নুহ সংঘৰ্ষৰ তদন্তৰ দাবী জনায়।
ইফালে এই সাম্প্ৰদায়িক সংঘৰ্ষত নিহতৰ পৰিয়ালক ১ কোটি টকা আৰু আহতৰ পৰিয়ালক ৫০ লাখ টকা ক্ষতিপূৰণ দিবলৈ দাবী জনায় সমাৱেশত। লগতে মহাপঞ্চায়তখনে আন স্থানৰ পৰা অহা লোকৰ বাবে কঠোৰ আইন প্ৰণয়নৰ বাবেও দাবী উত্থাপন কৰে।
লক্ষণীয়ভাৱে অহা ২৮ আগষ্টত নুহত পুনৰ জালাহিছেক যাত্ৰা অনুষ্ঠিত কৰাৰ সিদ্ধান্ত লোৱা হৈছে সমাৱেশত। উল্লেখ্য যে, এই সমাৱেশ সাম্প্ৰদায়িক সংঘৰ্ষই ধুই যোৱা নুহতে অনুষ্ঠিত কৰাৰ পৰিকল্পনা কৰা হৈছিল। অৱশ্যে আৰক্ষীৰ পৰা অনুমতি নিদিয়াত সমাৱেশ পালৱাললৈ স্থানান্তৰ কৰা হয়।
আইন-শৃংখলাৰ পৰিস্থিতিৰ প্ৰতি লক্ষ্য ৰাখি মহাপঞ্চায়ত অনুষ্ঠিত কৰাৰ বাবে কট্টৰ হিন্দুত্ববাদী সংগঠন বজৰং দল আৰু বিশ্ব হিন্দু পৰিষদক অনুমতি দিয়া হোৱা নাছিল যদিও আজিৰ এই সমাৱেশত দুয়োটা সংগঠনৰ সদস্যই অংশগ্ৰহণ কৰা বুলি জানিব পৰা গৈছে।